Dentro do programa de actividades que a Academia Galega de Seguridade ten previsto realizar no ano 2005, e conforme ás funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a celebración dun curso superior de protección civil, que deberá desenvolverse conforme as seguintes bases:
Primeira.-Obxectivos.
A formación, capacitación e perfeccionamento profesional do persoal técnico en temas de protección civil, tendo en conta as súas funcións de responsabilidade na planificación, coordinación, dirección e toma de decisións en todo tipo de emerxencias.
Segunda.-Destinatarios.
-Persoal técnico de proteccion civil da Administración autónoma de Galicia.
-Persoal técnico, funcionarios con responsabilidade en protección civil da Administración local (bombeiros, policía local, funcionarios municipais con responsabilidade en protección civil) e da Administración xeral do Estado en Galicia.
-Xefe, subxefe ou xefe de unidade das agrupacións de voluntarios de protección civil da Comunidade Autónoma de Galicia que teñan realizado o curso básico e cando menos dous de segundo nivel.
Terceira.-Desenvolvemento.
1. Prazas: o número de prazas ofertadas é de 27.
2. Duración e datas: o curso dará comezo o día 7 de marzo de 2005, e terá unha duración de 130 horas lectivas.
O curso desenvolverase os luns e martes todo o día.
O horario será o seguinte:
-Mañás: das 9.30 ás 14.00 horas.
-Tardes: das 16.00 ás 20.00 horas.
3. Lugar: o curso realizarase na sede da Academia Galega de Seguridade, no concello da Estrada.
Cuarta.-Solicitudes e prazo de inscrición.
1. A inscrición dos participantes é totalmente gratuíta.
2. O persoal que desexe participar nestes cursos deberá presentar, cuberta a máquina ou con letra moi clara, a instancia que figura no anexo.
3. O prazo para a presentación de instancias rematará o día 20 de febreiro de 2005.
4. As instancias deberán vir asinadas polo presidente da agrupación ou xefe do organismo a que estea adscrito e seladas, e no caso de haber máis dunha solicitude da mesma entidade, relacionalas en orde prioritaria. Este será requisito indispensable para ser admitido no curso.
5. As instancias deberán enviarse por correo á sede da Academia Galega de Seguridade: avenida da Cultura, s/n, 36680 A Estrada ou fax nº 986 59 09 88 ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
Quinta.-Contido.
O curso consta de once módulos con clases teórico-prácticas:
Módulo I: Riscos naturais. Temporais, choivas, xeadas, fortes ventos. (Predición meteorolóxica. Interpretación de boletíns de fenómenos meteorolóxicos e mapas). Movementos sísmicos. Encoros.
Módulo II: Riscos tecnolóxicos: Risco químico. Transportes de mercadorías perigosas. Risco radioactivo. Risco gas natural.
Módulo III: Prevención e protección contra os incendios urbanos e forestais.
Módulo IV: Tráfico e seguridade vial.
Módulo V: Cartografía, orientación e localización. Interpretación de planos.
Módulo VI: Asistencia sanitaria e apoio psicolóxico en situacións de catástrofes e accidentes.
Módulo VII: Normativa legal. A protección civil como servizo público. Agrupacións de voluntarios de protección civil. Responsabilidade civil e penal.
Módulo VIII: Análise de risco.
Módulo IX: Prevención. Autoprotección e planificación.
Módulo X: Dirección e xestión das emerxencias.
Módulo XI: Información á poboación e aos medios de comunicación. Telecomunicación e sistemas de información.
Sexta.-Relación de admitidos.
A relación de participantes admitidos para a realización do curso exporase no taboleiro de anuncios da Academia Galega de Seguridade, sen prexuízo da oportuna notificación aos seleccionados con antelación á celebración do curso. Tamén poden confirmar a súa admisión chamando ao teléfono 986 59 00 21.
Sétima.-Asistencia.
É obrigatoria a asistencia e puntualidade en todas as actividades do curso. A falta de asistencia, mesmo cando sexa xustificada, a máis dun 10% das horas lectivas programadas determinará a cualificación de non apto no curso.
Oitava.-Certificado de aproveitamento.
Ao remate dos cursos entregaráselles un certificado de asistencia e aproveitamento a aquelas persoas que acrediten a súa asistencia continuada e superen as correspondentes probas de coñecementos e a realización dun traballo escrito, relativo aos módulos que o compoñen.
Novena.-Modificacións.
A Academia Galega de Seguridade poderá modificar o desenvolvemento dos cursos para adaptar os ás necesidades da administración e ás continxencias que poidan xurdir.
A Estrada, 14 de xaneiro de 2005.
Juan José Fariñas-Ferro Rodríguez
Director xeral da Academia Galega de Seguridade