Por orde desta consellería do 10 de novembro de 2004, resolveuse non aprobar o Plan Xeral de Ordenación Municipal de San Cibrao das Viñas, de conformidade co previsto no artigo 85.5º b) da Lei 9/2002, de 30 de decembro, de ordenación urbanística e protección do medio rural de Galicia, ordenando a emenda dunha serie de deficiencias.
Segundo se fai constar en certificación municipal que consta no expediente, o concello, en sesión plenaria do 16 de decembro de 2004, aprobou as correccións e modificacións derivadas da Orde do 10 de novembro de 2004.
O Concello de San Cibrao das Viñas remite o documento refundido do Plan Xeral de Ordenación Municipal para a súa aprobación definitiva de conformidade co previsto no artigo 85.5º da Lei 9/2002, do 30 de decembro, de ordenación urbanística e protección do medio rural de Galicia.
De conformidade co disposto polo artigo 89.1º da Lei 9/2002, a competencia para a aprobación definitiva dos plans xerais de ordenación municipal correspóndelle ao conselleiro competente en materia de urbanismo e ordenación do territorio.
Visto canto antecede, ao abeiro do disposto no artigo 85.5º a) da Lei 9/2002, do 30 de decembro, de ordenación urbanística e protección do medio rural de Galicia, e por proposta da Dirección Xeral de Urbanismo segundo informe do 29 de decembro de 2004,
RESOLVO:
Artigo 1º.-Apróbase o Plan Xeral de Ordenación Municipal de San Cibrao das Viñas, coa seguinte puntualización:
-No artigo 170 da normativa (ordenanza O-1 de barrios orixinarios) o texto: inclúense neste nivel de protección os edificios inventariados nas normas provinciais, os cales presentan en xeral unha excepcional calidade arquitectónica e valor histórico, que se inclúe no seu punto 4.2.1.3.1, letra a), deberá substituírse por este outro: inclúense neste nivel de protección os edificios do núcleo inventariados no
catálogo do presente plan xeral, os cales presentan en xeral unha excepcional calidade arquitectónica e valor histórico.
Artigo 2º.-De conformidade co disposto polos artigos 92 da Lei 9/2002, e 70 da Lei 7/1985, do 2 de abril, reguladora das bases de réxime local, o concello deberá publicar a normativa e ordenanzas do plan aprobado definitivamente no BOP.
Disposición derradeira
Contra esta orde, que pon fin á vía administrativa, cabe interpoñer recurso contencioso-administrativo ante a sala correspondente do Tribunal Superior de Xustiza de Galicia, no prazo de dous meses contados desde o día seguinte ao da súa publicación, segundo dispoñen os artigos 10 e 46 da Lei 29/1998, do 13 de xullo, reguladora da xurisdición contencioso-administrativa.
Santiago de Compostela, 30 de decembro de 2004.
Alberto Núñez Feijoo
Vicepresidente primeiro e conselleiro de Política
Territorial, Obras Públicas e Vivenda