O convenio de apoio financeiro ás pequenas e medianas empresas subscrito entre o Instituto Galego de Promoción Económica e as entidades financeiras, publicado mediante Resolución do 27 de xaneiro de 2004 (DOG nº 20, do 30 de xaneiro), prevé a publicación no Diario Oficial de Galicia do límite de crédito dispoñible para a concesión de axudas no ano 2005 e das partidas orzamentarias asignadas ao seu financiamento, así como do volume global de préstamos a subsidiar e do tipo de xuro aplicable para o primeiro semestre de 2005.
Dado que a aplicación da cláusula transitoria do ano 2004 supuxo un incremento importante dos proxectos que se van apoiar mediante este programa e tendo en conta a demanda de financiamento manifestada polas pemes galegas para novos proxectos que se van realizar, considérase conveniente establecer unha nova cláusula modificando o requisito de emprego para acceder a condicións de subsidiación máis beneficiosas, estendendo a súa aplicación ás solicitudes de axuda presentadas no ano 2005, así como realizar as modificacións oportunas no convenio.
Por todo o anterior, e de conformidade coas facultades que teño conferidas
RESOLVO:
Primeiro.-Para o ano 2005, as axudas reguladas no convenio de apoio financeiro ás pequenas e medianas empresas subscrito entre o Instituto Galego de Promoción Económica e as entidades financeiras, publicado mediante Resolución do 27 de xaneiro de 2004 (DOG nº 20, do 30 de xaneiro), financiaranse con cargo ás aplicacións orzamentarias 02.01.01/06/05.656700 cun crédito plurianual de 1.200.000 euros para o ano 2005, de 4.050.000 euros para o ano 2006 e de 2.250.000 euros para o ano 2007 e 02.01.01/02/01.656700 cun crédito plurianual de 61.750,12 euros para o ano 2005, de 226.417,10 euros para o ano 2006 e de 123.500,24 euros para o ano 2007. A concesión das axudas condicionarase á existencia de crédito orzamentario suficiente.
Segundo.-O volume global de préstamos que se van subsidiar non poderá superar 80 millóns de euros.
Terceiro.-Para o primeiro semestre do ano 2005, o tipo de xuro nominal será o 3,35%. No caso de que o tipo adicional sexa inferior a 1,15 puntos,
o tipo de xuro que se vai aplicar será o resultado de engadir ao tipo de referencia (2,217) o tipo adicional que teñan pactado as partes. Se o tipo de xuro resultase con varios decimais, redondearase ata a máis próxima vixésima parte do punto.
Cuarto.-Modifícase o convenio, nos seguintes termos:
A cláusula 8ª, puntos 8.2.2 e 8.2.3, pasan a ter a seguinte redacción:
8.2.2. Sistema de amortización.
Establécense dous sistemas de amortización optativos:
Sistema de amortización lineal.-As amortizacións realizaraas o prestameiro en cotas de amortización de capital trimestrais iguais, con vencemento o último día do trimestre natural, debendo recoller a póliza ou escritura o número de cotas e as datas nas que se producirán a primeira e a última.
Sistema de amortización francés.-As amortizacións realizaranse polo prestameiro en cotas de amortización de capital e xuros mensuais iguais, con vencemento o último día do mes natural, debendo recoller a póliza ou escritura o número de cotas e as datas nas que se producirán a primeira e a última.
O préstamo poderá ser amortizado de forma anticipada, total ou parcialmente, á vontade do prestameiro. As amortizacións anticipadas parciais que, se é o caso, realice voluntariamente o prestameiro deberán aplicarse a reducir en igual contía as cotas de amortización restantes, sen que se produzan variacións no prazo de amortización do préstamo.
A entidade financeira deberá comunicar puntualmente as ditas amortizacións anticipadas indicando data e importe das mesmas, co obxecto de que o Igape calcule o novo importe da subvención e o importe a reintegrar polo beneficiario ao Igape.
8.2.3. Liquidación de xuros.
Sistema de amortización lineal.-A liquidación de xuros, ao igual que as amortizacións, será por trimestres naturais vencidos, devengándose o último día do trimestre natural, calculándose os xuros en función do capital vivo, agás para o período de carencia no que a cota de xuros determinarase en función do préstamo efectivamente disposto.
Os trimestres serán sempre de 90 días e todos os meses de 30 días, computándose estes para a liquidación desde a data de disposición, incluída esta.
Sistema de amortización francés.-A liquidación de xuros, ao igual que as amortizacións, será por meses naturais vencidos, devengándose o último día do mes natural, calculándose os xuros en función do capital vivo, agás para o período de carencia no que a cota de xuros determinarase en función do préstamo efectivamente disposto.
Os meses serán sempre de 30 días, computándose estos para a liquidación desde a data de disposición, incluída esta.
Quinto.-Establécese unha nova cláusula de aplicación transitoria con vixencia durante o ano 2005, de modo que para as solicitudes de axudas presentadas no Igape no ano 2005 se establecen as seguintes condicións:
Primeira.-As cláusulas 8ª.3.4 e 8ª.3.5 quedan modificadas pola seguinte redacción:
8ª.3.4.-A subsidiación do tipo de xuro será de 2,35 puntos para empresas de nova creación, empresas que creen 3 ou máis empregos con contrato indefinido, sempre que sexa mantido durante polo menos dous anos desde a data de contratación, empresas que realicen o seu proxecto investidor nalgún dos municipios de localización prioritaria que se relacionan no anexo X ou empresas nas que a actividade principal sexa o transporte público de mercadorías ou de viaxeiros por estrada e acometan proxectos de renovación da frota dirixidos á súa modernización e mellora ambiental, e de 1,35 puntos para o resto dos casos.
8ª.3.5.-O tipo de xuro resultante para o beneficiario, é dicir, o tipo de xuro menos os puntos de subsidiación, non poderá ser inferior ao 1% para empresas de nova creación, empresas que creen 5 ou máis empregos, empresas que realicen o seu proxecto investidor nalgún dos municipios de localización prioritaria que se relacionan no anexo X ou empresas nas que a actividade principal sexa o transporte público de mercadorías ou de viaxeiros por estrada e acometan proxectos de renovación da frota dirixidos á súa modernización e mellora ambiental, e ao 2% para o resto dos casos.
Segunda.-Para o exercicio 2005, nas operacións de préstamo por importe inferior a 600.000 A destinadas a financiar investimentos levados a cabo por empresas de nova creación, empresas que realicen o seu proxecto de investimento nalgún dos municipios de localización prioritaria que se relacionan no anexo X, ou empresas que a súa actividade principal sexa o transporte público de mercadorías ou de viaxeiros por estrada que acometan proxectos de renovación da frota dirixidos á súa modernización e mellora ambiental, cando as Sociedades de Garantía Recíproca que subscriben este convenio outorguen un aval do 80% do préstamo sen máis garantías que as persoais do solicitante, estas recibirán do Igape unha achega ao Fondo de Provisións Técnicas do 4% sobre o saldo de risco vivo o 31 de decembro de 2004 derivado das citadas operacións formalizadas a partir da entrada en vigor deste convenio.
A achega do Igape liquidarase por solicitude das S.G.R. unha vez vencido o exercicio 2005, achegando a tal fin unha declaración das operacións que cumpran os requisitos establecidos de acordo coas instrucións que a tal fin aprobe a Dirección Xeral do Igape.
Para estas operacións, a achega do solicitante ao capital da Sociedade de Garantía Recíproca, recuperable á cancelación do préstamo avalado, será do 3% do importe do aval formalizado, sen prexuízo do previsto na cláusula 8.3.3 deste convenio respecto á comisión polo aval.
A achega ás SGR regulada nesta cláusula financiarase con cargo á partida 02.01.01/02/02.656700 dos orzamentos do Igape para o ano 2005 cun límite de crédito de 240.000 A.
Sexto.-O texto do anexo III (modelo de comunicación de concesión de préstamo) substitúese polo que se une a esta resolución.
Sétimo.-Esta resolución entrará en vigor o día 3 de xaneiro de 2005.
Santiago de Compostela, 27 de decembro de 2004.
Margarita Rodríguez Rama
Directora xeral do Instituto Galego de Promoción
Económica