Dentro dos programas de actividades que a Academia Galega de Seguridade ten previsto realizar no ano 2005, e conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a realización dun curso de capacitación para a escala técnica (oficiais) de policía local, segundo o previsto no artigo 23 da Lei 3/1992, do 23 de marzo, de coordinación das policías locais, que deberá desenvolverse conforme as seguintes bases:
Obxectivos.
-Mellorar o compromiso profesional de servizo público aos cidadáns, baixo parámetros actitudinais de eficacia e de ética policial.
-Facilitarlles aos alumnos unha actualización xurídico-normativa e de operativa profesional que lles permita un mellor exercicio da súa función profesional.
-Dotalos das ferramentas técnicas e estratéxicas que lles permitan unha organización e estruturación adecuada dos recursos humanos e dos medios materiais de que dispoñan.
-Implicar os alumnos nos procedementos e filosofías de xestión adecuados para acadar habilidades sociais e organizativas para unha calidade de servizo e unha eficacia progresivas.
Destinatarios.
O curso vai dirixido aos membros dos corpos de policía local que recentemente superaran o proceso selectivo para a categoría de oficial, tanto por oposición libre como por promoción interna, dos distintos concellos de Galicia.
Inscrición.
A inscrición dos participantes será totalmente gratuíta, debéndose comunicar esta antes do 14 de xaneiro de 2005 para efectuar a correspondente reserva de praza.
Prazas.
Sen límite.
Solicitudes.
1. Os concellos que se atopen nesta situación deberán remitir un escrito á Academia Galega de Seguridade, solicitando a participación no curso, no que figure a lista de persoas que superaron as correspondentes probas de oposición ou a fase de concurso e cubrir o anexo con todos os datos nel reflectidos, para efectuar a correspondente reserva de praza para a realización do devandito curso.
2. O prazo para a remisión de escritos rematará o día 14 de xaneiro de 2005.
3. Os escritos deberán enviarse á Academia Galega de Seguridade: avenida da Cultura, s/n, 36680 A Estrada. Previamente remitiranse por fax para axilizar os correspondentes trámites.
Contido e duración.
O deseño deste curso inclúe as seguintes áreas e módulos:
* Área operativa profesional.
Módulo I. Policía de tráfico e transporte.
Módulo II. Policía de protección e seguridade.
Módulo III. Policía xudicial e de investigación.
* Área xurídica.
Módulo IV. Aplicación policial do dereito penal e procesual.
Módulo V. Aplicación policial do dereito administrativo.
* Área de xestión e dirección.
Módulo VI. Organización de servizos e recursos.
Módulo VII. Comunicación e liderado.
* Traballo ou tese individual.
Que será escollido polo alumno e que consistirá na elaboración dun proxecto de investigación, organización ou dirección, que debe estar referido á súa actividade profesional, tendo como obxectivo xeral a mellora do contorno de traballo ou da organización xeral nos que o alumno vai desempeñar os seus cometidos profesionais.
O curso terá unha duración de tres meses (250 horas lectivas).
Estrutura do curso.
Este curso tén dúas partes ben diferenciadas, que se complementan necesariamente: unha delas é de tipo presencial, e outra que responde ao modelo de formación a distancia, coas necesarias titorías e facilitación de material para os propios alumnos desta fase.
Para aqueles alumnos de novo ingreso nos corpos de policía local, esta segunda fase completa tamén o período de prácticas no seu posto de traballo.
Datas.
O curso principiará o vindeiro día 17 de xaneiro de 2005.
Desenvolvemento do curso.
Os alumnos da Academia Galega de Seguridade, durante o seu período de permanencia na academia, rexeranse polo Regulamento de réxime interior desta, publicado no DOG nº 144, do 28 de xullo de 1995.
Certificado.
Para obter o correspondente diploma será requisito indispensable superar todas as materias que figuren no programa.
Modificacións.
A Academia Galega de Seguridade poderá modificar o desenvolvemento normal do curso para adaptalo ás necesidades da Administración e ás continxencias que poidan xurdir.
A Estrada, 16 de decembro de 2004.
Juan José Fariñas-Ferro Rodríguez
Director xeral da Academia Galega de Seguridade