O ente público Portos de Galicia, en cumprimento do artigo 96 da Lei 48/2003, do 26 de novembro, de réxime económico e prestación de servizos nos portos de interese xeral, e do artigo 19.2º da Lei
27/1992, do 24 de novembro, de portos do Estado e da mariña mercante, modificada pola Lei 62/1997, do 26 de decembro, redactou o Plan de utilización dos espazos portuarios do porto de Meloxo en setembro de 2003.
Segundo o previsto na lexislación vixente, o citado plan foi tramitado polo ente público Portos de Galicia. Como resultado da tramitación do expediente, o Plan de utilización do porto de Meloxo foi modificado en marzo de 2004.
En reunión do Consello de Administración de Portos de Galicia, do día 1 de abril de 2004, e en cumprimento do disposto no artigo 13 e) do Decreto 227/1995, do 20 de xullo, polo que se aproba o Regulamento do ente público, modificado polo Decreto 83/2002, do 28 de febreiro, e co artigo 96 da Lei 48/2003, de réxime económico e de prestación de servizos nos portos de interese xeral, acordouse darlle conformidade ao Plan de utilización dos espazos portuarios do porto de Meloxo, así como elevalo e propolo para a súa aprobación.
Tendo en conta a consideración efectuada polo Servizo de Urbanismo e Inspección Territorial da Consellería de Política Territorial, Obras Públicas e Vivenda efectuada no informe recibido en data 7 de xuño de 2004, en data posterior á da celebración do mencionado Consello de Administración, no sentido da necesidade de cambiar a denominación da zona náutico-recreativa pola de náutico-deportiva, modificación que se efectuou no plan de utilización aprobado, dando como resultado unha nova e definitiva redacción del con data de xuño de 2004.
Tendo en conta que o cambio indicado no informe de urbanismo supón unha simple corrección de orde nominal e que non representa ningunha alteración dos usos previstos no plan de utilización que o Consello de Administración de Portos de Galicia propuxo para a súa aprobación.
Visto o expediente e o informe proposta do técnico da Área de Explotación e Planificación de Portos de Galicia, así como o acordo do Consello de Administración do ente público dándolle a conformidade ao Plan de utilización dos espazos portuarios do porto de Meloxo e acordando elevalo e propoñelo para a súa aprobación.
O presidente do Consello de Administración do ente público Portos de Galicia, por delegación do conselleiro de Política Territorial, Obras Públicas e Vivenda, conferida por Orde do 21 de novembro de 2002,
RESOLVE:
Aprobar o Plan de utilización dos espazos portuarios do porto de Meloxo (Pontevedra), redactado en xuño de 2004 pola enxeñeira de camiños, canles e portos Guiomar Cabezas Martínez e pola enxeñeira directora Ana Isabel Calzadilla Bouzón.
Santiago de Compostela, 13 de xullo de 2004.
Carlos Negreira Souto
Presidente do ente público Portos de Galicia