Dentro do Plan de actividades da Escola Galega de Administración Pública para 2004, e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócase, en colaboración coa Revista de Derecho Urbanístico y Medio Ambiente, unha xornada sobre a xestión de novos desenvolvementos urbanísticos, conforme as seguintes bases:
1. Obxectivos.
A realidade urbanística vai mudando paulatinamente e a mostra é que os modelos existentes, hai poucos anos tendentes á obtención do solo destinado principalmente a vivendas, están sendo superados por novas actuacións urbanísticas influenciadas por diferentes sectores. O turismo é, na actualidade, o primeiro motor do urbanismo tradicional, pero este leva pola súa vez aparellado comercio a grande escala, lecer, deporte e, necesariamente, infraestruturas que fagan viable o anterior. Xa non só se pretende propoñer vivendas, senón que estas se atopan dentro dun amplo conxunto que oferta outras propostas complementarias.
Esta xornada pretende dar un repaso a cada un destes sectores e espertar o latente ánimo existente, verbo da concepción dos novos desenvolvementos urbanísticos.
2. Contido.
Trataranse estes temas:
-Urbanismo e turismo residencial e de aloxamento. Implicacións urbanísticas da nova lexislación autónoma en materia turística.
-Urbanismo e grandes centros comerciais e de lecer. Implicacións urbanísticas da normativa en materia comercial. A obtención e xestión do solo destinado a centros comerciais e de lecer.
-Urbanismo e grandes infraestruturas: o exemplo da remodelación das zonas de servizo dos portos de interese xeral. Réxime xurídico dos portos deportivos.
-Obras públicas e urbanismo: estradas e ferrocarrís. Especial referencia ao réxime xurídico dos aeroportos.
-Xestión de campos de golf desde unha perspectiva urbanística e ambiental. Obtención e xestión do solo. Avaliación do impacto ambiental. O problema da auga.
-Réxime xurídico dos proxectos de interese supramunicipal: o urbanismo autonómico. Implantación de proxectos no solo non urbanizable na lexislación galega. Avaliación estratéxica dos planos e avaliación do impacto ambiental dos proxectos.
3. Destinatarios.
Persoal ao servizo da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
O lugar e a data: a xornada convocada desenvolverase no salón de actos do Centro Cultural Xuvenil A Fábrica, en Perillo, no concello de Oleiros, sito en Peirao do Inglés da citada localidade, o día 21 de decembro de 2004.
5. Inscrición.
-Prazo: remata o venres, día 17 de decembro de 2004.
-Tramitación de solicitudes: as solicitudes irán dirixidas ao director da Escola Galega de Administración Pública; polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión chamando por teléfono, o día 20 de decembro, das 8.30 ás 14.30 horas, aos seguintes números 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolver as incidencias que puidesen xurdir no desenvolvemento desta xornada, así como a de cancelala, se o escaso número de solicitudes non xustificase a súa realización.
7. Certificación de asistencia.
Entregaráselles, ao remate da xornada, a aquelas persoas inscritas que concorresen asiduamente a esta, cando a súa asistencia sexa igual ou superior ao 85% das horas lectivas programadas, e expresarase neste documento a natureza da actividade e a data da súa realización.
Santiago de Compostela, 24 de novembro de 2004.
Domingo Bello Janeiro
Director da Escola Galega de Administración
Pública
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA