Enrique Gesteiro Prieto faleceu o 27 de setembro de 2003 na Residencia-Fogar da Terceira Idade Porta do Camiño de Santiago de Compostela. O finado outorgou derradeiro testamento en escritura pública do 27 de outubro de 1998, instituíndo como única e universal herdeira a Comunidade Autónoma de Galicia.
Segundo o artigo 17 da Lei 3/1985, do 12 de abril, do patrimonio da Comunidade Autónoma galega, a adquisición pura e simple de bens a título gratuíto ou lucrativo requirirá decreto do Consello da Xunta de Galicia, por proposta da Consellería de Economía e Facenda. A aceptación de herdanzas entenderase sempre a beneficio de inventario.
Na súa virtude, por proposta do conselleiro de Economía e Facenda, feita nos termos en que Enrique Gesteiro Prieto acordou a súa herdanza, e logo de deliberación do Consello da Xunta de Galicia na súa reunión do catro de novembro de dous mil catro,
DISPOÑO:
Artigo 1º
Aceptar, a beneficio de inventario, a herdanza feita a favor da Comunidade Autónoma de Galicia por Enrique Gesteiro Prieto.
Por vontade do causante, o herdado destinarase ás necesidades da Residencia-Fogar da Terceira Idade Porta do Camiño de Santiago de Compostela, dependente da actual Consellería de Familia, Xuventude, Deporte e Voluntariado.
Artigo 2º
A Consellería de Economía e Facenda, a través da Secretaría Xeral e do Patrimonio, levará a cabo todos os trámites necesarios para a efectividade deste decreto.
Santiago de Compostela, catro de novembro de dous mil catro.
Manuel Fraga Iribarne
Presidente
José Antonio Orza Fernández
Conselleiro de Economía e Facenda