O Regulamento (CEE) nº 2847/1993, do Consello, do 12 de outubro de 1993 e as súas posteriores modificacións, polo que se establece un réxime de control aplicable á política pesqueira común, introduce no seu título II, control de capturas, artigo 13, a obriga de que todos os produtos da pesca desembarcados ou importados na comunidade, e para os que no presentase unha nota de venda, nin unha declaración de recollida, e que se transporten a un lugar distinto do desembarque ou importación, deberán ir acompañados dun documento ata que se efectúe a primeira venda.
No artigo 9 do citado regulamento comunitario di que cando os produtos non se poñan á venda ou se destinen a unha venda posterior deberán presentar ás autoridades competentes unha declaración de recollida.
Este regulamento trasládase parcialmente á lexislación nacional mediante o Real decreto 1998/1995, do 7 de decembro, polo que se ditan as normas para o control da primeira venda dos produtos pesqueiros, co obxecto de establecer a normativa básica en materia de ordenación do sector pesqueiro que lle atribúe ao Estado o artigo 149.1º.19 da Constitución.
O Decreto 419/1993, do 17 de decembro, establece no capítulo I do título II, da descarga e a venda, e no seu artigo 10, que se o propietario das especies descargadas decide vender estas nunha lonxa ou centro de venda distintos do porto de descarga, deberá obter previamente a Guía de descarga.
A Comunidade Autónoma de Galicia publicou a Orde do 19 de agosto de 1996 pola que se establecen as normas de control das capturas pesqueiras na fase da primeira venda.
O Real decreto 571/1999, do 9 de abril, establece no seu capítulo II, normas para a recolleita ou o transporte de lotes a un centro de expedición, o de depuración, unha zona de reinstalación ou un establecemento de transformación a obriga, de que cada lote de moluscos bivalvos vivos deberá ir acompañado dun documento de rexistro, durante o seu transporte, co fin de coñecer a orixe deles.
De acordo co anteriormente disposto, logo da consulta aos sectores pesqueiro e comercializador afectados, e en virtude das facultades que teño conferidas,
DISPOÑO:
Capítulo I
Disposicións xerais
Artigo 1º.-Obxecto e ámbito.
O obxecto da presente orde é regular, no ámbito territorial da Comunidade Autónoma, a descarga e transporte dos produtos pesqueiros frescos ata a pri
meira venda en lonxa ou centro de venda autorizado, e o transporte de moluscos bivalvos vivos desde a zona de produción ata un centro de expedición, ou de depuración, unha zona de reinstalación, ou un establecemento de transformación.
Así mesmo, incluiranse no regulado nesta disposición aqueles productos da acuicultura que teñan como destino a primeira venda en lonxa ou centro de venda autorizado.
Artigo 2º.-Autorizacións.
As lonxas pesqueiras ou outros establecementos que pretendan realizar a primeira venda dos produtos pesqueiros marítimos frescos, de acordo co establecido no artigo 1º, deberán ser autorizados pola consellería competente en materia pesqueira, e deberán figurar no Rexistro Galego de Empresas Halioalimentarias regulado polo decreto da Xunta de Galicia 420/1993, do 17 de decembro, polo que se refunde a normativa vixente en materia de Rexistro de Buques e de Empresas Halioalimentarias.
Capítulo II
Descarga e transporte dos produtos
pesqueiros frescos
Artigo 3º.-Documento de transporte.
No caso dos productos pesqueiros frescos, que non pasasen a primeira venda, e sexan desembarcados en porto, ou descargados, procederase á poxa na lonxa ou centro de venda do porto de descarga, se é o caso. Non obstante, se o propietario das especies descargadas decide vender estas noutra lonxa ou centro de venda, distintos do lugar da descarga, poderá facer o transporte das ditas especies por vía terrestre ata a lonxa ou centro de destino onde se vai realizar a súa primeira venda.
Todos os produtos pesqueiros frescos deberán ir acompañados do seguinte documento durante o seu transporte por vía terrestre, ata a primeira venda:
Documento de transporte: sempre que as especies non se poñan á venda na lonxa do mesmo porto onde se realiza a descarga, a entidade concesionaria da lonxa ou centro de descarga, emitirá un documento de transporte, co formato que aparece no anexo I, que acompañará o produto en todo momento ata a primeira venda e que, deberá conter os seguintes datos:
* Data da descarga.
* O nome do armador ou do capitán do buque.
* Lonxa, porto ou centro de descarga, e entidade responsable del.
* Identificación da embarcación: nome e marcas externas, así como número de rexistro comunitario, folio, armador, nº de permex, ou, se é o caso, para barcos que non teñan porto base na Comunidade Autónoma, licenza de pesca.
* Identificación do mariscador: nome, DNI, nºde permex.
* Identificación das especies descargadas e transportadas cantidade, nome (comercial e científico), orixe, e cando proceda, o tamaño mínimo correspondente
* Zona de pesca.
* Lonxa, centro de venda, ou centro almacenamento de destino.
* Identificación do transportista: nome ou razón social, NIF, vehículo.
* Para produtos desembarcados de buques de países terceiros: o nome, as marcas de identificación externas, indicativo internacional de radio e pavillón do buque.
* No caso das importacións no realizadas por barco, indicarase o lugar no que se realizou a importación do envío, e o nome do consignatario
O transportista é o responsable de entregar unha copia do documento de transporte, á persoa responsable da entidade concesionaria da lonxa ou centro de venda de destino, a que comprobará a súa veracidade.
No caso de dispoñer de equipamentos informáticos que permitan o rexistro do contido do documento de transporte, rexistrarase automáticamente o seu contido, estando obrigado a gardar unha copia durante un período de tres anos.
Este documento pode ser substituída por algún dos seguintes documentos:
* Copia da declaración de desembarque á que se refire o artigo 8 do Regulamento CEE 2847/1993 en que conste as cantidades transportadas, e, en calquera caso a orixe do envío e o destino dos produtos.
* Copia do documento T2M en que conste a orixe das cantidades transportadas.
No se exixirá este documento cando o transporte se realice dentro do recinto portuario.
Artigo 4º.-Declaración de recollida.
Cando os produtos pesqueiros frescos desembarcados ou descargados, non se poñan á venda na poxa inmediatamente posterior á descarga, ou sexan retirados dela, o seu propietario ou o seu representante, cubrirá o documento Declaración de recollida, sendo responsable da súa presentación ante a Consellería de Pesca e Asuntos Marítimos.
A declaración de recollida terá o formato do anexo II, e deberá conter os seguintes datos:
* Denominación comercial e científica de cada especie, a súa zona xeográfica de orixe ou de cría.
* Peso desagregado segundo a forma de presentación e para cada especie.
* Nome, marcas de identificación externa e pavillón do buque, para produtos desembarcados de buques comunitarios, así como o número interno do rexistro comunitario de buques, se é o caso.
* Para os produtos desembarcados de buques de países terceiros: o nome, as marcas de identificación externas, indicativo internacional de radio, e pavillón do buque.
* Nome do armador ou do capitán do buque.
* Porto e a data de desembarque ou o lugar e a data da descarga.
* Lugar ou lugares onde os produtos están almacenados.
* Se é o caso, referencia o documento de transporte ou o documento T2M correspondente.
Cando a comercialización dos produtos pesqueiros frescos fose obxecto dun prezo contractual ou dun prezo a tanto alzado fixado para un período de tempo determinado, o propietario dos produtos ou o seu representante deberán cubrir, así mesmo, o documento de recollida e remitir ao órgano competente, sen prexuízo da presentación da nota de venda, cando corresponda.
Artigo 5º.-Prazos de entrega da documentación referida neste capítulo.
Remitiranse tanto a declaración de recollida, como o documento de transporte nun prazo máximo de 48 horas a partir do momento do desembarque ou descarga á Subdirección Xeral de Mercados de Pesca da Consellería de Pesca e Asuntos Marítimos, pola a entidade que realizara as vendas.
No caso de dispoñer de equipos informáticos que permitan o rexistro do contido do documento de transporte e o documento de recollida, poderá realizar a presentación telemática deste documentos.
Capítulo III
Transporte dos moluscos bivalvos vivos
Artigo 6º.-Documento de rexistro para moluscos bivalvos vivos.
Cada lote de moluscos bivalvos vivos deberá ir acompañado durante o seu transporte, desde a zona de produción ata un centro de expedición, un centro de depuración, unha zona de reinstalación, o un establecemento de transformación, dun documento de rexistro orixinal, que terá o formato do anexo III, e que conterá os seguintes datos:
* Identidade e dirección do recolledor.
* Data de recolección.
* Localización da zona de producción, o máis detallado posible o número de código.
* Cualificación sanitaria da zona : A, B ou C.
* Relación das especies de moluscos e a súa cantidade.
* Numero de autorización e lugar de destino para su expedición, reinstalación, depuración o transformación.
Este documento terá una validez de cinco días desde a súa data de expedición.
Artigo 7º.-Da emisión do documento de rexistro
1. As delegacións territoriais e comarcais da Consellería de Pesca e Asuntos Marítimos, entregarán os talonarios dos documentos de rexistro para moluscos bivalvos, levando un rexistro deles e as entidades ás que se entregaron.
2. Os documentos serán expedidos, por petición do recolleitador, polas organizacións de produtores, confrarías de pescadores, entidades asociativas do sector produtivo legalmente constituídas, entidades concesionaria dos centros de venda, e, se é o caso, polos titulares de establecementos de cultivos mariños.
3. No caso de peche temporal dunha zona de produción e de reinstalación, as entidades encargadas de emisión do documento de rexistro deixarán de expedir documentos para esa zona e deixarán inmediatamente sen validez os documentos de rexistro xa expedidos na data do peche.
Artigo 8º.-Das obrigas das entidades de destino.
1. Os centros de depuración aceptarán só os lotes de moluscos bivalvos vivos que vaian acompañados do documento de rexistro.
2. No momento da entrega dun lote de moluscos bivalvos vivos na entidade de destino deberá estamparse a data de entrega no documento de rexistro correspondente.
3. Os responsables dos centros, zonas, ou establecementos de destino deberán conservar durante, polo menos doce meses, unha copia de cada documento de rexistro, así como os produtores.
4. Os centros de depuración que envíen moluscos bivalvos vivos a centros de expedición deberán presentar o documento de rexistro, en que, ademais, se indique a duración da depuración, a dirección do centro de depuración, así como calquera información necesaria para identificar o produto e coñecer a súa procedencia.
5. No prazo de 48 horas desde a recepción do lote, a entidade de destino remitirá copia do documento de rexistro coa data de entrega estampada, ás delegacións territoriais e comarcais da Consellería de Pesca e Asuntos marítimos.
Disposicións adicionais
Primeira.-As infraccións ao disposto na presente orde serán obxecto de sanción, de acordo coa Lei 8/2004, do 30 de xullo, de protección, control, infraccións, e sancións en materia marítimo-pesqueiras de Galicia.
Segunda.-Se os produtos pesqueiros frescos foron vendidos, e se transportan a outro lugar, o transportista deberá poder probar, en todo momento a transacción efectuada, mediante a nota de venda, ou calquera outro documento, incluída a factura, albará ou fotocopia compulsada dalgún destes dous documentos que deberán indicar, como mínimo, lonxa de orixe, data da transacción, identificación das especies transportadas, cantidade delas e lugar de destino.
Terceira.-No caso de productos pesqueiros frescos que teñan que pasar un punto de control, de acordo co plan de explotación correspondente, a mercadoría non poderá ser retirada deste punto polo mesmo propietario que a entrega, salvo que este decida vender nunha lonxa distinta á do seu ámbito. Neste caso necesitará un documento de transporte para o seu desprazamento, de acordo co establecido no artigo 3º.
Cuarta.-O documento de transporte regulado no artigo 3º da presente orde terá a mesma validez e producirá os mesmos efectos que a Guía de descarga regulada no Decreto 419/1993, do 17 de decembro.
Quinta.-Naquelas lonxas ou centros de venda, en que os moluscos sexan expostos á venda mesturados sen diferenciar o produtor, poderá substituír no documento de rexistro o nome do recolleitador polo do representante, logo de solicitude por escrito e autorización por parte da consellería competente en materia pesqueira.
Sexta.-Os talonarios cos documentos definidos nos anexos I, II e III: documento de transporte, declaración de recollida e documento de rexistro para moluscos bivalvos vivos, serán entregados nas delegacións territoriais ou comarcais da Consellería de Pesca e Asuntos Marítimos.
Disposicións transitorias
Primeira.-Malia o disposto no artigo 2º, parágrafo primeiro, as lonxas pesqueiras ou outros establecementos que realizan a primeira venda dos produtos pesqueiros frescos terán un prazo de trinta (30) días hábiles, desde a entrada en vigor desta orde para inscribirse, se é o caso, no Rexistro Galego de Industrias Halioalimentarias regulado polo decreto da Xunta de Galicia 420/1993, do 17 de decembro, polo que se refunde a normativa vixente en materia de Rexistro de Buques e de Empresas Halioalimentarias.
Segunda.-Aquelas confrarías, que no seu ámbito territorial, teñan portos sen lonxa, e se efectúen descargas de produtos pesqueiros frescos, referidos nesta orde, terán un prazo de cen (100) días naturais, desde a entrada en vigor dela para solicitar a autorización dun centro de descarga.
En tanto non teñan autorizado o dito centro, poderán seguir usando o modelo de folla de transporte á que se refire a Orde do 19 de agosto de 1996, no seu anexo II, para o transporte dos produtos pesqueiros frescos ata a lonxa ou centro de venda de destino.
Disposicións derrogatorias
Primeira.-Queda derrogada a Orde do 19 de agosto de 1996 pola que se establecen as normas de control das capturas na fase de primeira venda.
Segunda.-Derrógase a Orde do 3 de xullo de 1998 pola que se regula o documento de rexistro para o transporte e comercialización de moluscos bivalvos vivos.
Disposicións derradeiras
Primeira.-Autorízase o director xeral de Estruturas e Mercados da Pesca para ditar as disposicións necesarias para o desenvolvemento da presente orde.
Segunda.-A presente orde entrará en vigor ao día seguinte da súa publicación no Diario Oficial de Galicia.
Santiago de Compostela, 5 de novembro de 2004.
Enrique César López Veiga
Conselleiro de Pesca e Asuntos Marítimos
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA
