Dentro do plan de actividades da Escola Galega de Administración Pública para o 2004 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse, en colaboración coa Consellería de Familia, Xuventude, Deporte e Voluntariado e a Fundación Paideia, unhas xornadas sobre a protección xurídica do discapacitado, conforme as seguintes bases:
1. Obxectivos.
En 1982 promulgouse a Lei de integración social dos minusválidos. Transcorridos máis de 20 anos da devandita norma, pode afirmarse que non cubriu os obxectivos que se propuña, incumprindo o mandato constitucional. En 2003 tivo lugar o Ano Europeo do Discapacitado, o que deu como froito unha serie de disposicións no mesmo ámbito, que perseguen abordar de forma máis contundente este problema. A este nivel é indiscutible o papel preeminente que deben xogar as administracións públicas, ao ter que concienciarse e asumir moitas das obrigas impostas por esta nova lexislación. En suma, trátase de mellorar a formación dos asistentes neste eido, coa exposición e posterior debate, por parte de destacados especialistas, dunha serie de relatorios verbo das cuestións de maior relevo nesta materia.
2. Contido.
Trataranse estes temas:
-Principio de protección xurídica do discapacitado.
-Vivenda, traballo e discapacidade.
-O patrimonio do discapacitado.
-Aspectos sucesorios da protección do discapacitado.
-A autotutela.
-O novo contrato de alimentos.
3. Destinatarios.
Persoal ao servizo da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e data: as xornadas convocadas desenvolveranse no salón de actos da Fundación Paideia na Coruña, sito na praza María Pita, 17, da citada localidade, os días 25 e 26 de novembro de 2004.
5. Inscrición.
-Prazo: remata o martes, día 23 de novembro de 2004.
-Tramitación de solicitudes: as solicitudes irán dirixidas ao director da Escola Galega de Administración Pública, polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscrición fóra de prazo: só se admitirán de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando por teléfono, o día 24 de novembro, das 8.30 ás 14.30 horas, nos seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolver as incidencias que puidesen xurdir no desenvolvemento das xornadas, así como o de cancelalas, se o escaso número de solicitudes non xustificase a súa realización.
7. Certificación de asistencia.
Entregaráselles, ao remate das xornadas, a aquelas persoas inscritas que concorresen asiduamente a el, cando a súa asistencia sexa igual ou superior ao 85% das horas lectivas programadas, e expresarase neste documento a natureza da actividade e as datas da súa realización.
Santiago de Compostela, 18 de outubro de 2004.
Domingo Bello Janeiro
Director da Escola Galega de Administración Pública
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA
