Examinado o expediente que presenta José Carlos Pereira Calviño, no que solicita autorización para a apertura e funcionamento do centro privado de artes plásticas e deseño Atlántico de Vigo (Pontevedra), para impartir os ciclos formativos de grao medio de engastado en quenda de tarde-noite e o de procedementos de xoiería artística en quenda de mañá, ambos os dous da familia profesional de xoiería de arte.
Tendo en conta que o expediente foi tramitado pola Delegación Provincial da Consellería de Educación e Ordenación Universitaria de Pontevedra, quen o remite cos informes correspondentes.
Vistos o Real decreto 389/1992, do 15 de abril (BOE do 28 de abril), polo que se establecen os requisitos mínimos dos centros que impartan ensinanzas artísticas; o Decreto 253/1995, do 29 de setembro (DOG do 11 de outubro), sobre autorización a centros docentes privados para impartir ensinanzas artísticas, e a Orde do 5 de decembro de 1995 (DOG do 7 de febreiro de 1996) pola que se desenvolve o dito decreto.
Considerando que concorren no expediente os requisitos esixidos nas disposicións vixentes para poder acceder ao solicitado.
Esta consellería, por proposta da Dirección Xeral de Centros e Ordenación Educativa,
DISPÓN:
Primeiro.-Autorizar a apertura e funcionamento do centro privado de artes plásticas e deseño Atlántico de Vigo (Pontevedra), para impartir os ciclos formativos de grao medio de engastado en quenda de tarde-noite e o de procedementos de xoiería artística en quenda de mañá, ambos os dous da familia profesional de xoiería de arte, segundo os datos que se especifican no anexo.
Segundo.-Antes do inicio das ensinanzas que se autorizan, a Delegación Provincial da Consellería de Educación e Ordenación Universitaria, logo do informe da Inspección Educativa, aprobará expresamente a relación de persoal que impartirá docencia no devandito centro, así como o equipamento adecuado.
Terceiro.-Queda o centro obrigado ao cumprimento da lexislación vixente e a solicitar a oportuna revisión cando teña que modificarse calquera dos datos que sinala a presente orde.
Contra esta orde, que esgota a vía administrativa, os interesados poderán interpoñer recurso potestativo de reposición perante o conselleiro de Educación e Ordenación Universitaria, no prazo dun mes, a partir do día seguinte ao da súa publicación no Diario Oficial de Galicia, segundo o disposto nos artigos 116 e 117 da Lei 4/1999 (BOE do 14 de xaneiro), de modificación da Lei 30/1992, de réxime xurídico das administracións públicas e do procedemento administrativo común, ou ben directamente o recurso contencioso-administrativo no prazo de dous meses perante o Tribunal Superior de Xustiza de Galicia.
Santiago de Compostela, 16 de setembro de 2004.
Celso Currás Fernández
Conselleiro de Educación e Ordenación
Universitaria
ANEXO
Provincia: Pontevedra.
Concello: Vigo.
Localidade: Cabral.
Enderezo: avda. da Ponte, 9.
Código do centro: 36024533.
Denominación xenérica: centro privado autorizado de artes plásticas e deseño.
Denominación específica: Atlántico.
Titular: Escuela Técnica de Joyería del Atlántico, S.L.
Ensinanzas que se autorizan:
Familia profesional: xoiería de arte.
1 ciclo formativo de grao medio de engastado (1 unidade para 20 alumnos) en quenda de tarde-noite.
1 ciclo formativo de grao medio de procedementos de xoiería artística (2 unidades para 20 alumnos/unidade).