O Decreto 70/2004, do 25 de marzo, ten por obxecto o establecemento do código numérico persoal e do sistema de acreditación electrónica dos profesionais que interveñen nos procedementos de prestación e xestión de servizos do sistema sanitario público galego.
De conformidade co artigo 1 do antedito decreto, este código está constituído por 16 díxitos e é único para cada profesional na súa relación co sistema sanitario público galego.
O sistema de acreditación electrónica, segundo o artigo 2, estará composto polo código numérico persoal, os datos complementarios necesarios para a identificación do profesional e, se for o caso, o número de colexiado.
O artigo 3 indica que este código se incorporará e se fará constar en todos os procesos informáticos e nos documentos físicos e electrónicos da Administración sanitaria galega en que sexa precisa a identificación dos profesionais.
Para cumprir o anterior fin, o artigo 4 establece que a Administración sanitaria galega procederá á incorporación do código numérico persoal nos procesos informáticos e nos documentos físicos e electrónicos do seu ámbito de competencias en que sexa precisa a identificación dos profesionais.
Na actualidade moitos dos procedementos clínicos e de xestión da Consellería de Sanidade e do Sergas están informatizados ou en fase de informatización. Polo tanto, mentres non se substitúan todos os documentos en papel por documentos electrónicos con sinatura dixital, cómpre incorporar o código numérico persoal aos documentos en papel en que sexa precisa a identificación do profesional, mediante a utilización de selos normalizados.
A disposición derradeira primeira faculta o conselleiro de Sanidade para dictar as disposicións precisas para a execución do establecido neste decreto.
En consecuencia, e con obxecto de alcanzar este fin, no uso das facultades que me confire o artigo 34.6º da Lei 1/1983, do 22 de febreiro, reguladora da Xunta e do seu presidente, reformada pola Lei 11/1988, do 22 de outubro,
DISPOÑO:
Artigo 1º.-Obxecto.
A presente orde ten por obxecto o deseño, o uso e a subministración dos selos oficiais de profesionais
que interveñen nos procedementos de prestación ou xestión de servizos do sistema sanitario público galego.
Artigo 2º.-Deseño dos selos.
1. Os selos oficiais constan da seguinte información:
a) Nome e apelidos do profesional.
b) Código numérico persoal.
c) Número de colexiado, no caso de que se trate dun profesional colexiado.
Cando o nome e os apelidos teñan un número de caracteres que superen a capacidade do selo, utilizaranse abreviaturas normalizadas pola Secretaría Xeral da Consellería de Sanidade.
2. Formato dos selos.
a) O tamaño da superficie impresa é de 40 milímetros de longo e 15 milímetros de alto.
b) Na parte superior esquerda consta a cruz do Sergas.
c) A información do selo organízase en tres liñas:
-Na primeira consta o código numérico persoal.
-A segunda liña contén o nome e o primeiro apelido do profesional.
-A terceira liña recolle o segundo apelido do profesional e o número de colexiado, se for o caso.
Artigo 3º.-Uso dos selos oficiais.
Os selos oficiais son de uso obrigatorio en todos aqueles documentos non informatizados relativos á prestación e xestión de servizos sanitarios en que sexa necesaria a identificación do profesional.
Os selos son persoais e intransferibles, calquera que sexa o carácter e a duración do contrato de vinculación do profesional ao Sergas ou á Consellería de Sanidade nos centros e ámbitos asistenciais onde exerzan as súas funcións.
Artigo 4º.-Xestión e control da subministración dos selos.
Correspóndelle á xerencia dos centros asistenciais do Sergas a que estea vinculado o profesional, a xestión e o control da subministración e do uso dos selos oficiais. Estas mesmas funcións corresponderanlles aos servizos centrais da Consellería de Sanidade e do Sergas, así como ás direccións provinciais do Sergas e ás delegacións provinciais da Consellería de Sanidade respecto dos profesionais adscritos a estes centros directivos e aos doutros centros que interveñan nos procedementos de prestación e xestión de servizos.
Antes da subministración comprobarase a validez do código numérico do profesional, así como dos demais datos recollidos no selo.
Disposicións transitorias
Primeira.-Antes de finalizar o ano 2004 facilitaranse os selos oficiais aos facultativos prescritores de receitas oficiais do Sergas.
O secretario xeral da Consellería de Sanidade determinará de forma progresiva a incorporación doutros grupos de profesionais en función das necesidades funcionais.
Segunda.-Mentres non se substitúan os sistemas eléctricos de impresión mecánica (imprinters) por sistemas informatizados, utilizaranse estes sistemas de impresión con placas actualizadas coa información especificada no punto segundo, alínea c) do artigo 2º desta orde.
Disposición derrogatoria
Queda derrogado o establecido na Orde do 22 de outubro de 1999 pola que se regula a subministración de talonarios de receitas oficiais de Galicia, no relativo aos selos oficiais.
Disposicións derradeiras
Primeira.-Facúltase o secretario xeral da Consellería de Sanidade para adoptar as medidas axeitadas en relación coa execución e desenvolvemento da presente orde.
Segunda.-A presente orde entrará en vigor o día seguinte á súa publicación no Diario Oficial de Galicia.
Santiago de Compostela, 20 de setembro de 2004.
José M. González Álvarez
Conselleiro de Sanidade
