Examinado o expediente de deslindamento dos montes veciñais en man común das parroquias de Combarro e San Xoán, pertencente ás comunidades do mesmo nome do concello de Poio (Pontevedra) e tendo en conta os seguintes:
Antecedentes de feito.
Primeiro.-Que o Xurado Provincial de Clasificación de Montes Veciñais en Man Común, en resolucións do 19 de novembro de 1981, declarou como tales os montes de Combarro e de San Xoán, asinando as súas pertenzas ás parroquias de Combarro e San Xoán respectivamente, do concello de Poio (Pontevedra).
Segundo.-O deslindamento parcial dos ditos montes foi aprobado por Orde do 1 de febreiro de 1996 da Consellería de Agricultura, Gandería e Montes (DOG nº 35, do 19 de febreiro), e foi anulado por sentenza da sección terceira da Sala do Contencioso-Administrativo do Tribunal Superior de Xustiza de Galicia do 26 de marzo de 1999, que mandaba retrotraer o expediente administrativo á 1ª fase do procedemento.
Terceiro.-No ano 2003, e unha vez firme a sentenza citada, iníciase novamente o procedemento administrativo do deslindamento parcial dos ditos montes.
O 2 de maio de 2003 publícase no BOP de Pontevedra o anuncio do edicto de deslindamento e fíxase como como data de comezo do apeo o 15 de setembro de 2003, consonte co establecido nos artigos 96 ao 124 do Regulamento de montes aprobado polo Decreto 485/1962, do 22 de febreiro, fanse as notificacións, con xustificante de recepción, a todos os propietarios lindantes dos que se ten coñecemento, así mesmo colócanse edictos no concello e nos sitios de costume. O Gabinete Xurídico Territorial de Pontevedra fai a clasificación da documentación presentada e o enxeñeiro operador realiza a clasificación de predios e dereitos, non sendo preciso que o xefe do Servizo de Montes e Industrias Forestais de Pontevedra fixera anotacións preventivas por tratarse do deslindamento parcial de dous montes veciñais en man coún.
Cuarto.-O apeo do deslindamento comeza o 15 de setembro de 2003 consonte co indicado no edicto e conclúe o 25 do mesmo mes. No BOP do 27 de xaneiro de 2004 e mediante anuncio, ábrese o período de vista e reclamacións de expediente, remitíndose o dito anuncio ao concello de Poio e ás comunidades afectadas para a súa máxima difusión.
Quinto.-Recibiuse unha reclamación que foi informada polo Gabinete Xurídico Territorial de Pontevedra e remitida co dito informe, ás comunidades afectadas para que manifestasen a súa conformidade ou desconformidade con esta, non contestando as comunidades.
Finalmente, o 18 de xuño de 2004 o xefe do Servizo de Montes e Industrias Forestais de Pontevedra remite o expediente, xunto co seu informe-proposta, á Dirección Xeral de Montes e Industrias Forestais que informa favorablemente no sentido proposto polo xefe do servizo.
Fundamentos de dereito.
I. Que de acordo co disposto nos reais decretos 167/1981, do 9 de xaneiro; 1706/1982, do 24 de xullo e 1535/1984, do 20 de xuño, sobre transferencias de funcións e servizos do Estado á Comunidade Autónoma de Galicia en materia de conservación da natureza, no Decreto 23/2003, do 20 de xaneiro, polo que se establece a estrutura orgánica dos departamentos da Xunta de Galicia e finalmente, no Decreto 106/2004, do 27 de maio, polo que se establece a estrutura orgánica da Consellería de Medio Ambiente, o conselleiro de Medio Ambiente é competente para ditar esta orde.
II. O Servizo de Montes e Industrias Forestais de Pontevedra é competente para levar adiante o dito deslindamento, cumpridas todas as prescricións legais en canto á publicidade, notificación e demais requisitos exixidos nos artigos 82 ao 125 do Regulamento de montes aprobado polo Decreto 485/1962, do 22 de febreiro.
III. As resolucións do Xurado Provincial de Clasificación de Montes Vecinais en Man Común son as únicas que outorgan a propiedade e estas só poden modificarse por sentenzas dos tribunais ordinarios polo que o enxeñeiro operador non pode senón dar cumprimento ás do 19 de novembro de 1981 ao facer o apeo e na súa proposta.
Tendo en conta os preceptos legais citados e demais de xeral aplicación e o informe-proposta do xefe do Servizo de Montes e Industrias Forestais de Pontevedra.
Esta consellería, por proposta da Dirección Xeral de Montes e Industrias Forestais,
DISPÓN:
Primeiro.-Aprobar o deslindamento parcial dos montes veciñais en man común de Combarro e San Xoán, pertencentes ás comunidades das parroquias dos mesmos nomes do concello de Poio (Pontevedra), consonte coas actas, rexistros topográficos e planos que figuran no expediente, quedando os montes coas seguintes descricións:
Provincia: Pontevedra.
Nome: Montes de Combarro.
Concello: Poio.
Pertenza: C.M.V.M.C. de Combarro.
Lindes:
Norte: montes de San Xoán de Poio e predios particulares.
Leste e sur: predios particulares da parroquia de Combarro.
Oeste: montes de Samieira e concello de Meis.
Descrición de lindeiros: iníciase no piquete nº 1 no punto máis alto na divisoria entre os concellos de Poio
e Meis, en colindancia con este concello e a C.M.V.M.C. de San Xoán de Poio. Dende alí desprázase en dirección SL ata alcanzar o piquete nº 2 nun alto nomeado Caseta de Juan, colindando neste tramo coa C.M.V.M.C. de San Xoán, descende mantendo a mesma orientación xeral, seguindo os piquetes nº 3, nº 4 e nº 5 coa mesma colindancia, alcanzando no piquete nº 5 a parte norte do muro da Tomada de Simón ou Cova Salgueira, segue o muro en dirección S ata alcanzar o piquete j , logo segue en dirección SL ata alcanzar o k e en dirección L ata os piquetes nº l e o nº 7, colindando neste tramo con propietarios particulares da Tomada de Simón ou Cova Salgueira. Dende o piquete nº 7 diríxese con orientación SL ata alcanzar o piquete nº 8 situado a 99 metros, neste punto cambia a dirección a NL alcanzando o piquete nº 9 a 321 metros situado na valgada alta do regato Padornelo augas arriba do nomeado Barranco das Carballas.
Cabida total: 146 hectáreas.
Provincia: Pontevedra.
Nome: montes de San Xoán de Poio.
Concello: Poio.
Pertenza: C.M.V.M.C. de San Xoán de Poio
Lindes:
Norte: concello de Meis.
Leste: concellos de Pontevedra e Barro.
Sur: predios particulares.
Oeste: montes de Combarro e predios particulares da Tomada de Simón ou Cova Salgueira.
Descripción de lindeiros: iníciase no piquete nº 9 situado na valgada alta do regato Padornelo, augas arriba do nomeado Barranco das Carballas, dende alí desprázase en dirección SO ata alcanzar o piquete nº 8 situado a 321 metros, neste punto cambia a súa dirección a O ata o piquete nº 7 situado a 99 metros, colindando neste tramo cos montes de Combarro da C.M.V.M.C. de Combarro. Desde este punto diríxese primeiro ao L e logo ao N ao O e ao S, seguindo o muro que limita a Tomada de Simón ou Cova Salgueira, e pasando polos piquetes a, b, c, d, e, f, g, h, e i alcanzando o piquete nº 5 na parte norte do muro da tomada. Neste tramo colinda con propietarios particulares. Do piquete nº 5 segue en dirección NO seguindo os piquetes nº 4, nº 3 e nº 2 atopándose este último nun alto nomeado Caseta de Juan, colindando neste tramo de novo coa C.M.V.M.C. de Combarro. Do piquete nº 2 e mantendo a dirección NO chégase ao piquete nº 1 no punto máis alto da divisoria entre os concellos de Poio e
Meis, mantendo neste tramo a colindancia coa C.M.V.M.C. de Combarro e alcanzando a colindancia co concello de Meis.
Cabida total: 741,6 hectáreas.
Segundo.-Que se acorde a cancelación total ou parcial de calquera inscrición rexistral, en canto resultare contraditoria coa descrición dos montes.
Terceiro.-Esta orde entrará en vigor o día seguinte ao da súa publicación, no Diario Oficial de Galicia.
Santiago de Compostela, 28 de setembro de 2004.
José Manuel Barreiro Fernández
Conselleiro de Medio Ambiente