En cumprimento do disposto no artigo 25.4º da Lei 10/1995, do 13 de novembro, de ordenación do territorio de Galicia e o artigo 13.5º do Decreto 80/2000, do 23 de marzo, polo que se regulan os plans e proxectos sectoriais de incidencia supramunicipal, este organismo autónomo dispón que se publique no DOG o acordo adoptado polo Consello da Xunta de Galicia na súa reunión do 22 de xullo de 2004, do que de seguido se reproduce a súa parte dispositiva de xeito literal:
«Aprobar o proxecto sectorial do aproveitamento hidroeléctrico do salto de Gomil no río Mandeo, nos concellos de Aranga e Curtis (A Coruña), promovido pola sociedade Técnicos Asociados Gallegos, S.L.
As determinacións contidas no proxecto teñen forza vinculante para as administracións públicas e para os particulares e prevalecen sobre as determinacións do planeamento urbanístico, conforme o establece o artigo 11 punto 1º do Decreto 80/2000.
De conformidade co artigo 24 da Lei 10/1995 e co 11 punto 2º do Decreto 80/2000, os concellos deberán adaptar o seu planeamento urbanístico ao contido no proxecto sectorial. A devandita adaptación realizarase nos prazos que determina o proxecto.
Conforme o establecido no artigo 25 da Lei 10/1995, decláranse de utilidade pública, para efectos expropiatorios, os bens e dereitos precisos para a súa execución».
Santiago de Compostela, 29 de xullo de 2004.
P.D. (Resolución 9-4-2003, DOG do 16 de abril)
Emilio García Gallego
Director xeral do organismo autónomo
Augas de Galicia