A Orde do 15 de xuño de 2004 (DOG nº 144, do 27 de xullo) desenvolve, por primeira vez na comunidade autónoma, esta liña de axudas. Debido á novidade que presenta este programa e á necesidade de que os potenciais beneficiarios obteñan a información necesaria para se poderen acoller a este tipo de axudas, así como as datas de publicación no DOG, considérase oportuno ampliar o prazo de presentación de solicitudes, para acadar a efectividade da medida.
De acordo con todo o anterior, e no exercicio das facultades que me confiere o artigo 34 da Lei 1/1983, do 22 de febreiro, reguladora da Xunta e do seu presidente,
DISPOÑO:
Artigo único.-Ampliación do prazo para a presentación de solicitudes.
O prazo para a presentación de solicitudes ao abeiro da Orde do 15 de xuño pola que se establecen as bases reguladoras e se convocan para o ano 2004 incentivos ás familias para a conciliación da vida laboral e familiar (DOG número 144, do 27 de xullo) amplíase ata o 13 de outubro de 2004.
Na súa consecuencia, queda modificada a mención ao dito prazo recollido na disposición adicional sexta da Orde do 15 de xuño, que debe entenderse referida ao 13 de outubro de 2004.
Disposicións derradeiras
Primeira.-Facúltase o director xeral de Promoción do Emprego para que dite, no ámbito das súas competencias, as resolucións e aclaracións necesarias para o desenvolvemento e cumprimento desta orde.
Segunda.-Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 23 de setembro de 2004.
Belén Prado Sanjurjo
Conselleira de Asuntos Sociais, Emprego
e Relacións Laborais