Por orde da Consellería de Innovación, Industria e Comercio do 29 de decembro de 2003, modificáronse as bases que rexen as convocatorias de axudas correspondentes aos programas sectoriais de recursos naturais, tecnoloxías para a innovación e servizos ao cidadán do Plan Galego de Investigación, Desenvolvemento e Innovación Tecnolóxica, aprobadas polas ordes do 22 e 29 de abril de 2002 (Diario Oficial de Galicia do 30 de abril, 13 e 15 de maio).

No punto oitavo da devandita orde establécese que nos proxectos de centros tecnolóxicos privados, de empresas, agrupacións de empresas, asociacións sen ánimo de lucro e nas dotacións de laboratorios e departamentos de I+D, de empresas, agrupacións de empresas e asociacións sen ánimo de lucro, para percibir as axudas correspondentes será preciso presentar na data límite do 30 de setembro do exercicio correspondente á anualidade de que se trate, os documentos requiridos.

Tendo en conta o atraso producido na resolución das devanditas axudas, motivado polo longo proceso de avaliación, considérase preciso ampliar o prazo de xustificación dos gastos realizados no ano 2004, polo que de conformidade co disposto no artigo 49 da Lei de réxime xurídico das administracións públicas e do procedemento administrativo común,

DISPOÑO:

Artigo único.-Ampliar ata o 15 de outubro de 2004 o prazo de presentación dos xustificantes correspondentes aos gastos realizados no ano 2004 para as modalidades de axudas e programas sectoriais, que a continuación se relacionan, e que foron concedidas ao abeiro da Orde do 29 de decembro de 2003 (Diario Oficial de Galicia do 12 de xaneiro de 2004).

-Modalidades de axudas:

1. Proxectos de investigación de centros tecnolóxicos privados da Comunidade Autónoma de Galicia.

2. Proxectos de investigación industrial, de innovación tecnolóxica, desenvolvemento precompetitivo ou proxectos de demostración de empresas, agrupacións de empresas e asociacións sen ánimo de lucro.

3. Dotación de laboratorios e departamentos de I+D de empresas, agrupacións de empresas e asociacións sen ánimo de lucro.

-Programas sectoriais:

1. Programa sectorial de recursos naturais:

-Recursos agropecuarios.

2. Programa sectorial de tecnoloxías para a innovación:

-Tecnoloxías da alimentación.

-Tecnoloxías da información e das comunicacións.

-Tecnoloxías de deseño e produción industrial

3. Programa sectorial de servizos ao cidadán:

-Sociedade da información.

Santiago de Compostela, 21 de setembro de 2004.

Juan Rodríguez Yuste

Conselleiro de Innovación, Industria e Comercio