Mediante Resolución do 14 de maio de 2004 publicouse un convenio, subscrito entre o Instituto Galego

de Promoción Económica (Igape) e diversas entidades financeiras, de apoio financeiro ao sector transporte público por estrada de Galicia, motivado pola importancia que ten este sector dentro do tecido socioeconómico da nosa comunidade e ao elevado investimento que estas empresas están levando a cabo para a renovación da frota de vehículos (DOG nº 100, do 26 de maio de 2004).

Tendo en conta o número e a contía dos proxectos presentados ao abeiro do citado convenio de apoio financeiro nos dous primeiros meses, así como a demanda manifestada polas empresas e entidades financeiras, faise necesaria a ampliación da liña habilitada ampliando a contía máxima a financiar e consecuentemente o crédito plurianual.

Polo tanto o Consello de Dirección do Igape, na súa xuntanza do 29 de xullo de 2004, acordou as modificacións que a seguir se publican para o seu coñecemento e entrada en vigor.

Polo que antecede, en virtude das facultades que teño conferidas mediante o artigo 12.a) da Lei 5/1992, do 10 de xuño, de creación do Instituto Galego de Promoción Económica e do artigo 11.1º.a) do Decreto 317/1992, do 12 de novembro, polo que se aproba o seu regulamento

RESOLVO:

Facer pública a modificación do convenio de apoio financeiro 2004-2006 ao sector do transporte público

por estrada de Galicia para a renovación da frota de vehículos subscrito entre o Instituto Galego de Promoción Económica e as entidades financeiras, acordada polo Consello de Dirección do Igape na súa xuntanza do 29 de xullo de 2004:

1. Amplíase o importe máximo de operacións que concederán as entidades financeiras adheridas ao convenio en 3.000.000 de euros máis, quedando establecido o límite total de operacións a financiar en 8.000.000 de euros.

2. Amplíase o crédito orzamentario do Igape para o ano 2004 en 278.000 euros máis, quedando establecido nun total de 518.490,38 euros, que se financiarán con cargo á aplicación orzamentaria 02.01 01/01/14 656700.

Santiago de Compostela, 29 de xullo de 2004.

Margarita Rodríguez Rama

Directora xeral do Instituto Galego

de Promoción Económica