A Lei orgánica 1/1981, do 6 de abril, pola que se aprobou o Estatuto de autonomía de Galicia, e o Real decreto 1763/1982, do 24 de xullo, sobre o traspaso de funcións e servizos da Administración do Estado á Comunidade Autónoma de Galicia, en materia de educación, recoñécenlle á nosa Comunidade Autónoma as competencias en materia de planificación, regulación e administración do ensino regrado en todos os niveis e graos, modalidades e especialidades, de acordo cos preceptos emanados da Constitución e das leis que lle sexan de aplicación, competencias que foron asumidas polo Decreto 114/1982, do 1 de setembro, e asignadas á Consellería de Educación e Ordenación Universitaria no seu artigo 2.

No marco destas competencias e da Lei orgánica 1/1990, do 3 de outubro, de ordenación xeral do sistema educativo, a Consellería de Educación e Ordenación Universitaria, co propósito de actualizar a cualificación dos cidadáns, persegue como un dos obxectivos básicos para a formación profesional o de lles dar unha resposta puntual e axeitada aos requirimentos de formación profesional provenientes do mundo produtivo.

A Lei orgánica 10/2002, do 23 de decembro, de calidade da educación, establece no seu artigo 7.6º que o sistema educativo garantirá que as persoas

adultas poidan adquirir, actualizar, completar ou ampliar os seus coñecementos para o seu desenvolvemento persoal e profesional.

O Decreto 88/1999, do 11 de marzo (DOG do 13 de abril), polo que se regula a ordenación xeral das ensinanzas de educación de persoas adultas e os requisitos mínimos dos centros, establece no artigo 5 que a Consellería de Educación e Ordenación Universitaria adecuará as ensinanzas de formación profesional ás peculiaridades e características das persoas adultas.

Así mesmo, o Plan Galego de Formación Profesional considera a cualificación profesional dos cidadáns como unha medida esencial para lles dar resposta ás necesidades do tecido produtivo, o que redundará nun aumento da empregabilidade e facilitará a libre circulación das persoas nas mesmas condicións de competitividade profesional que as dos países máis avanzados do noso contorno.

A Consellería de Educación e Ordenación Universitaria presenta a oferta de ciclos formativos para as persoas adultas, por módulos soltos, sendo consciente de que esta modalidade facilita a cualificación profesional, xa que ofrece a posibilidade de abordar a realización dun ciclo formativo en máis tempo e cun horario vespertino, e permite dar resposta ás demandas que suscitan o mercado laboral ou os colectivos específicos. Para realizalo, dunha maneira máis áxil e eficaz, en función das necesidades que vaian xurdindo, é aconsellable que a autorización dos ciclos formativos, por módulos soltos, se realice con carácter anual para cada curso académico.

Con base no anterior, e de acordo co Decreto 454/2003, do 26 de decembro (DOG do 19 de xaneiro de 2004), polo que se establece a estrutura orgánica da Consellería de Educación e Ordenación Universitaria, tendo en conta o informe da Dirección Xeral de Formación Profesional e Ensinanzas Especiais e de conformidade coa proposta da Dirección Xeral de Centros e Ordenación Educativa, esta consellería

DISPÓN:

Primeiro.-Suprimir a oferta modular de ciclos formativos, polo réxime de adultos, autorizada a partir do curso 2002-2003 ata a data actual.

Segundo.-Autorizar a oferta modular de ciclos formativos, polo réxime de adultos, para o curso 2004-2005, nos módulos e centros que se ralacionan no anexo.

Disposicións derradeiras

Primeira.-Autorízanse as direccións xerais de Formación Profesional e Ensinanzas Especiais, de Centros e Ordenación Educativa e de Persoal para adoptar as medidas precisas para a execución desta orde.

Segunda.-Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 24 de maio de 2004.

Celso Currás Fernández

Conselleiro de Educación e Ordenación Universitaria

ANEXO