Dentro do Plan de actividades da Escola Galega de Administración Pública para o ano 2004 e de acordo coas funcións atribuídas pola Lei 4/1987, do 27 de maio, de creación da Escola, e pola Lei 10/1989, do 10 de xullo, de modificación da anterior, convócanse, en colaboración co Centro de Estudos Xurídicos Superiores, unhas Xornadas sobre as novidades da Lei 33/2003, do 3 de novembro, do patrimonio das administracións públicas, conforme as seguintes bases:

1. Obxectivos.

Debater sobre as novidades máis sobresalientes da nova Lei 33/2003, do 3 de novembro, do patrimonio das administracións públicas, con especial atención a aspectos tan esenciais como a adquisi

ción, conservación, reivindicación, xestión, cambio de cualificación xurídica dos bens públicos, etc.

2. Contido.

Trataranse estes temas:

-O patrimonio das administracións públicas. Aspectos xerais, clasificación e principios legais. Ámbito de aplicación e relación coas restantes normas sobre patrimonio estatais e autonómicas.

-Réxime xurídico da xestión patrimonial dos bens públicos.

-As técnicas de protección e defensa do patrimonio das administracións públicas. En especial, novedades introducidas na dispoñibilidade de bens e dereitos, na súa inscrición rexistral e nas prerrogativas para a defensa do patrimonio público.

-Réxime xurídico da afectación, desafectación, mutación de destino, adscrición e desadscrición dos bens e dereitos públicos.

-Novidades lexislativas relativas ao uso e explotación dos bens e dereitos públicos.

-Novidades lexislativas relativas á adquisición de bens e dereitos polas administracións públicas.

3. Destinatarios.

Persoal ao servizo da Xunta de Galicia e da Administración local galega e interesados en xeral.

4. Desenvolvemento.

-Horario: mañá e tarde.

-Lugar e data: as xornadas convocadas desenvolveranse no salón de actos do edificio administrativo da Xunta de Galicia en Vigo (praza da Estrela-Concepción Arenal, nº 8, da citada cidade), os días 3 e 4 de xuño de 2004.

5. Inscrición.

-Prazo: remata o martes, día 1 de xuño de 2004.

-Tramitación de solicitudes: as solicitudes irán dirixidas ao director da Escola Galega de Administración Pública, polígono das Fontiñas, rúa de Madrid, 2-4, 15707, Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por fax: 981 54 63 30.

-Número de prazas: limitado á capacidade do local.

-Inscricións fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.

Os peticionarios poderán obter confirmación da súa posible admisión, chamando por teléfono, o día 2 de xuño, de 8.30 a 14.30 horas, aos seguintes números: 981 54 62 39/981 54 62 44 ou 981 54 60 40.

6. Modificacións.

A EGAP reserva para si a facultade de interpretar e de resolver as incidencias que puidesen xurdir no desenvolvemento das xornadas, así como o de cancelalas, se o escaso número de solicitudes non xustificase a súa realización.

7. Certificación de asistencia.

Entregaráselles, ao remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ao 85% das horas lectivas programadas, e expresarase, neste documento, a natureza da actividade e as datas da súa realización.

Santiago de Compostela, 13 de maio de 2004.

Domingo Bello Janeiro

Director da Escola Galega de Administración Pública