Mediante o Decreto 174/2003, do 13 de febreiro, (DOG nº 44, do 4 de marzo), a Comunidade Autónoma de Galicia acepta a cesión feita polo Concello de Nogueira de Ramuín, a título gratuíto, do dereito real de uso dos terreos contiguos ao mosteiro de Santo Estevo de Ribas de Sil, situado no termo municipal de Nogueira de Ramuín (Ourense), para a súa explotación turístico-cultural, por un prazo de noventa e nove anos.

Con data do 20 de maio de 2003, o Pleno do citado concello acordou a modificación do prazo de duración da cesión, fixándoo en setenta e cinco anos.

Conforme o artigo 17.1º da Lei 3/1985, do 12 de abril, do patrimonio da Comunidade Autónoma de Galicia, e 34 do seu regulamento aprobado polo Decreto 50/1989, do 9 de marzo, a adquisición pura e simple de bens a título gratuíto ou lucrativo requirirá decreto do Consello da Xunta de Galicia, por proposta da Consellería de Economía e Facenda.

Na súa virtude, por proposta do conselleiro de Economía e Facenda, feita nos termos acordados polo Concello de Nogueira de Ramuín, logo de deliberación do Consello da Xunta de Galicia na súa reunión do día cinco de maio de dous mil catro,

DISPOÑO:

Artigo único.-Modifícase o artigo 1 do Decreto 174/2003, do 13 de febreiro, polo que se acepta a cesión, a título gratuíto, dos terreos contiguos ao mosteiro de Santo Estevo de Ribas de Sil, situado no termo municipal de Nogueira de Ramuín (Ourense), (DOG nº 44, do 4 de marzo), que queda redactado como segue:

«Acéptase a cesión, feita polo Concello de Nogueira de Ramuín, a título gratuíto e por setenta e cinco anos, do dereito real de uso do predio contiguo ao mosteiro de Santo Estevo de Ribas de Sil, que se describe como segue:

Rústica.-Carballeira de nome Finca do Convento ou Cercado do Convento, situada no lugar de Santo Estevo de Ribas de Sil, termo municipal de Nogueira de Ramuín, dunha superficie de dúas hectáreas, cinco áreas e oitenta centiáreas e cos seguintes lindeiros: ao norte, José Fernández Torres, Isaac Fernández e outros veciños; ao sur, Mosteiro de Santo Estevo e herdeiros de Juan Taboada; ao leste, predio matriz e herdeiros de Visitación Castro e herdeiros

de Juan Taboada e outros; e ao oeste, Fernando Fernández Pérez.

Referencia catastral: 320530000007700007FB.

A dita parcela figura inscrita a nome do Concello de Nogueira de Ramuín no Rexistro da Propiedade de Ourense, número dous, tomo 1455, libro 88, folio 220, nº 10096».

Disposición derradeira

A Consellería de Economía e Facenda, a través da Secretaría Xeral e do Patrimonio, levará a cabo todos os trámites necesarios para a efectividade do presente decreto.

Santiago de Compostela, cinco de maio de dous mil catro.

Manuel Fraga Iribarne

Presidente

José Antonio Orza Fernández

Conselleiro de Economía e Facenda