O Concello de Barro, en sesión que tivo lugar o día dezaoito de setembro de dous mil tres, aprobou
o proxecto de accesos a Balixe da parroquia de Perdecanai e, na mesma sesión, acordou solicitar da Xunta de Galicia a declaración de urxente ocupación dos bens e dereitos afectados pola expropiación forzosa ao abeiro do disposto no artigo 52 da Lei de expropiación forzosa.
O Concello de Barro remitiu a documentación complementaria para a correcta tramitación do expediente, con data de entrada no rexistro xeral da Con
sellería de Xustiza, Interior e Administración Local o día seis de febreiro de dous mil catro.
Os bens en que se concreta a declaración de urxente ocupación están determinados no expediente que se someteu a información pública.
A Dirección Xeral de Urbanismo da Consellería de Política Territorial, Obras Públicas e Vivenda emitiu informe favorable. O dito informe tivo entrada no rexistro xeral da Consellería de Xustiza, Interior e Administración Local o día tres de decembro de dous mil tres.
A Dirección Xeral de Conservación da Natureza da Consellería de Medio Ambiente emitiu informe sobre o proxecto, no cal formula diversas consideracións que se deberán ter en conta, para o efecto de que a realización das obras teñan as mínimas afeccións ao medio natural. O dito informe tivo data de entrada no rexistro da Consellería de Xustiza, Interior e Administración Local o día vinte e dous de marzo de dous mil catro.
Considérase necesaria a declaración de urxente ocupación dos bens e dereitos precisos para a realización das obras do proxecto técnico sinalado, xa que, segundo sinala o concello, a urxencia se basea nos numerosos accidentes que ocorren no entroncamento da estrada nacional 550 debido á súa extrema estreiteza, que incluso impide circular nun tramo a máis dun vehículo, véndose obrigados a se deteren en puntos perigosos da estrada, polo que se fai necesaria a actuación para mellorar a seguridade vial e facilitar uns accesos adecuados.
A competencia para a declaración da urxente ocupación correspóndelle ao Consello da Xunta de Galicia segundo o disposto nos artigos 27.2º e 28.2º do Estatuto de autonomía de Galicia.
Na súa virtude, por proposta do conselleiro de Xustiza, Interior e Administración Local, e logo de deliberación do Consello da Xunta de Galicia na súa reunión do día vinte e tres de abril de dous mil catro,
DISPOÑO:
Artigo único.-De conformidade co disposto no artigo 52 da Lei de expropiación forzosa, declárase a urxente ocupación, polo Concello de Barro, para efectos de expropiación forzosa, dos bens e dereitos concretados no expediente administrativo instruído para o efecto e necesarios para a execución das obras do proxecto de accesos a Balixe da parroquia de Perdecanai, debendo, de ser o caso, unha vez ocupados os terreos necesarios, obter as autorizacións que fosen necesarias dos organismos competentes, con carácter previo ao inicio das obras.
Santiago de Compostela, vinte e tres de abril de dous mil catro.
Manuel Fraga Iribarne
Presidente
Jesús C. Palmou Lorenzo
Conselleiro de Xustiza, Interior e Administración
Local