Dentro do plan de actividades da Escola Galega de Administración Pública para 2004 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócase unha xornada sobre a necesidade de protección ante os malos tratos ás persoas maiores, conforme as seguintes bases:
1. Obxectivos.
A cuestión do maltrato ás persoas maiores estase analizando na actualidade dunha maneira moi fragmentada, pero hai que ter claro no contexto xeral no que se pode incardinar e os niveis sociolóxico e legal existentes. As situacións de maltrato teñen, en xeral, moita relación cos contextos familiares en que se realizan ou se estimulan, pero non é o único nivel en que estes se producen. O que maltrata faino moitas veces sen ter referente fixo, pero instintivamente estimulado pola fraxilidade do receptor do maltrato, constituíndo o grupo das persoas maiores
un dos colectivos máis susceptibles de ser víctimas destes.
Como o maltrato afecta tanto os danos físicos, psíquicos ou económicos, preténdese coas presentes xornadas presentar un abano de posibilidades onde os malos tratos se poden producir.
2. Contido.
Trataranse estes temas:
-A protección lexislativa das persoas maiores.
-O maltrato ás persoas maiores: a tipificación do contrato de alimentos.
-A capacidade de obrar e o ámbito da saúde.
-A especial protección das persoas maiores como consumidores.
-As persoas maiores en situación de dependencia.
3. Destinatarios.
Persoal ao servizo da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e datas: a xornada convocada desenvolverase no salón de actos do edificio administrativo da Xunta de Galicia en Ferrol (praza Camilo José Cela, s/n, da citada cidade), o día 5 de maio de 2004.
5. Inscrición.
-Prazo: remata o martes, día 4 de maio de 2004.
-Tramitación de solicitudes: as solicitudes irán dirixidas ao director da Escola Galega de Administración Pública, polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando por teléfono, o día 4 de maio, de 8.30 a 14.30 horas, aos seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolver as incidencias que puidesen xurdir no desenvolvemento das xornadas, así como o de cancelalas, se o escaso número de solicitudes non xustificase a súa realización.
7. Certificación de asistencia.
Entregaráselles, ao remate desta xornada, a aquelas persoas inscritas que concorresen asiduamente a elas, cando a súa asistencia sexa igual ou superior ao 85% das horas lectivas programadas, e expresarase, neste documento, a natureza da actividade e as datas da súa realización.
Santiago de Compostela, 20 de abril de 2004.
Domingo Bello Janeiro
Director da Escola Galega
de Administración Pública
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA
