Dentro dos programas de actividades que a Academia Galega de Seguridade ten previsto realizar no ano 2004, e conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a celebración de dous cursos básicos para auxiliares de policía local, segundo o previsto na disposición adicional II da Lei 3/1992, do 23 de marzo, de coordinación das
policías locais, que deberá desenvolverse conforme as seguintes bases:
* Obxectivos.
Os cursos teñen por obxectivos dotar os auxiliares de policía local dunha formación teórico-práctica que os capacite para o posterior desempeño da súa actividade profesional.
* Destinatarios.
Os cursos van dirixidos a todas aquelas persoas que sexan contratadas para desenvolver funcións de auxiliar de policía local durante a temporada de verán, nos concellos de Galicia.
* Inscrición.
A inscrición dos participantes será totalmente gratuíta, debéndose comunicar esta antes do 19 de maio de 2004 para efectuar a correspondente reserva de praza.
* Prazas.
Sen límite.
* Solicitudes.
1. Os concellos que se atopen nesta situación deberán remitir un escrito á Academia Galega de Seguridade, solicitando a participación no curso, no que figure a lista de persoas que van ser contratadas como auxiliares de policía local; para efectuar a correspondente reserva de praza para a realización do devandito curso.
2. O prazo para a remisión de escritos rematará o día 19 de maio de 2004.
3. Os escritos deberán enviarse á sede da Academia Galega de Seguridade: avenida da Cultura, s/n, 36680 A Estrada.
* Contido e duración.
Os cursos celebraranse en sesións de mañá e tarde, de luns a venres, e neles trataranse entre outras as seguintes materias:
-Intervención policial.
-Tráfico e seguridade vial.
-Policía administrativa.
-Intervención policial.
-Primeiros auxilios.
-Dereito penal.
-Dereito procesual-penal.
Os cursos terán unha duración de 5 días, cun total de 40 horas lectivas.
* Lugar.
Os cursos desenvolveranse na Academia Galega de Seguridade, sita na avenida da Cultura, s/n, 36680 A Estrada.
* Datas.
Os cursos desenvolveranse nas seguintes datas:
1º curso: do 24 ao 28 de maio.
2º curso: do 31 de maio ao 4 de xuño.
O horario dos cursos será de 10.00 a 14.00 horas e de 16.00 a 20.00 horas.
* Certificado.
Para obter o correspondente diploma será requisito indispensable superar a fase de formación teórica, onde o alumno ten que superar todas as materias que figuran no programa.
* Modificacións.
A Academia Galega de Seguridade poderá modificar o desenvolvemento dos cursos para adaptalo ás necesidades da Administración e ás continxencias que poidan xurdir.
A Estrada, 30 de marzo de 2004.
Juan José Fariñas-Ferro Rodríguez
Director xeral da Academia Galega de Seguridade
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA