O Real decreto 989/2000, do 2 de xuño (BOE do 22 de xuño), establece as especialidades do corpo de profesores de música e artes escénicas, adscribe a elas os profesores do dito corpo e determina as materias que deberán impartir.

O artigo 4 do citado Real decreto 989/2000 dispón que as administracións educativas determinarán as especialidades a que se refire o anexo I dese real decreto, ás que lles corresponda impartir as materias establecidas nos seus currículos que non estean adscritas a ningunha especialidade no anexo III.

Definidas as ensinanzas mínimas correspondentes ao grao elemental e medio das ensinanzas de música polo Real decreto 756/1992, do 29 de xuño (BOE do 27 de agosto), o Decreto 253/1993, do 29 de xullo (DOG do 25 de outubro), establece o currículo do grao elemental e do grao medio das ensinanzas de música e o acceso aos ditos graos para o ámbito competencial da Comunidade Autónoma de Galicia.

Neste Decreto 253/1993 establécense unha serie de materias propias do currículo desta Comunidade Autónoma. Cómpre, pois, determinar as especialidades do corpo de profesores de música e artes escénicas ás que lles corresponde impartilas.

Na súa virtude, e en uso da habilitación establecida na disposición derradeira segunda do citado Real decreto 989/2000, do 2 de xuño, esta Consellería de Educación e Ordenación Universitaria

DISPÓN:

Artigo único.-As materias que figuran no anexo a esta orde serán impartidas preferentemente polos titulares das especialidades que se relacionan no dito anexo. Así mesmo, no caso das materias adscritas a diferentes especialidades, a orde en que estas figuran no devandito anexo non significa prelación.

Disposicións derradeiras

Primeira.-Autorízase a Dirección Xeral de Persoal para ditar cantas normas se consideren oportunas para o desenvolvemento desta orde.

Segunda.-Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 25 de marzo de 2004.

Celso Currás Fernández

Conselleiro de Educación e Ordenación Universitaria

ANEXO