As instalacións xuvenís son un instrumento ao servizo dos mozos, e a Consellería de Familia, Xuventude, Deporte e Voluntariado é consciente da precariedade e insuficiencia de medios e instalacións axeitadas de que dispoñen as asociacións xuvenís e demais entidades públicas e privadas que realizan actividades coa infancia e coa xuventude. En consecuencia, co obxecto de facilitar o uso de instalacións axeitadas a estas entidades para a realización de actividades xuvenís no ámbito do lecer durante o verán deste ano, a Consellería de Familia, Xuventude, Deporte e Voluntariado pon á disposición destas e regula, a través desta orde e baixo a denominación de oferta concertada, o réxime de utilización das súas instalacións xuvenís durante a campaña verán-2004, que abrangue o período do 10 de xuño ao 30 de setembro.

Por todo isto,

DISPOÑO:

Artigo 1º.-Obxecto.

A Consellería de Familia, Xuventude, Deporte e Voluntariado convoca esta oferta de uso das súas instalacións xuvenís para a campaña de verán do ano que corre -que comprende do 10 de xuño ao 30 de setembro-, nos termos que se establecen nesta orde e de acordo coa distribución de prazas que se recolle no anexo I.

Artigo 2º.-Servizos ofertados.

O uso das instalacións ofertadas suporá dispoñer:

-Dos servizos de auga, gas, electricidade e alimentación en réxime de pensión completa.

-Do material (excepto o correspondente ás actividades específicas), que, no caso dos campamentos, comprende tamén as tendas de campaña, colchóns e mantas.

-Xerencia e persoal de servizo.

Artigo 3º.-Destinatarios.

Poderán solicitar o uso das instalacións de referencia:

1. As asociacións xuvenís, as entidades prestadoras de servizos á xuventude e as escolas de tempo libre, debidamente constituídas e legalizadas.

2. O Consello da Xuventude de Galicia e os consellos locais e municipais de Xuventude.

3. Corporacións locais.

4. Outras entidades públicas ou privadas que realicen actividades coa xuventude.

Artigo 4º.-Solicitude.

As solicitudes, subscritas por persoa suficientemente acreditada, presentaranse conforme o modelo normalizado recollido no anexo II desta orde, no rexistro xeral da Consellería de Familia, Xuventude, Deporte e Voluntariado, nos rexistros das súas delegacións provinciais ou por calquera dos procedementos establecidos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro.

O prazo de presentación de solicitudes será de 15 días naturais, contado a partir do día seguinte ao da publicación desta orde no Diario Oficial de Galicia.

Artigo 5º.-Criterios de adxudicación.

1. Para a adxudicación do uso das instalacións ofertadas establécese a seguinte orde de preferencia:

1) Asociacións xuvenís, entidades prestadoras de servizos á xuventude e escolas de tempo libre domiciliadas na Comunidade Autónoma galega e censadas ou rexistradas no correspondente censo ou rexistro dependente da Dirección Xeral de Xuventude.

2) Consello da Xuventude de Galicia.

3) Corporacións locais.

4) Asociacións xuvenís, entidades prestadoras de servizos á xuventude e escolas de tempo libre domiciliadas noutras comunidades autónomas.

5) Outras entidades públicas ou privadas que o soliciten con fins asistenciais.

2. Pola súa banda, dentro do previsto no parágrafo anterior, terán prioridade:

a) As que soliciten un maior número de prazas ata o tope máximo de cada instalación fixado no citado anexo I.

b) As solicitudes das entidades que cubran as prazas por convocatoria aberta e non reservadas exclusivamente aos seus membros ou asociados.

c) As entidades domiciliadas na Comunidade Autónoma galega.

d) As entidades que soliciten instalacións das que non gozaron nos dous últimos anos.

e) As que subvencionen o total ou parte da cota que teñen que pagar os participantes.

3. Sen prexuízo do disposto nos puntos 1 e 2 deste artigo, as entidades que en anos anteriores non fixeron uso das instalacións unha vez adxudicadas, sen presentar causa xustificada no seu momento, pasarán

a ocupar o último lugar dentro dos criterios de prioridade descritos nos puntos anteriores.

Artigo 6º.-Instrución e resolución.

As solicitudes presentadas serán examinadas por unha comisión de valoración constituída para o efecto, e que estará integrada por:

-A xefa do Servizo de Promoción de Actividades, que será o seu presidente.

-Os catro delegados provinciais da Consellería de Familia, Xuventude, Deporte e Voluntariado ou o funcionario en quen deleguen.

-Un representante do Consello da Xuventude de Galicia.

-Un funcionario da Dirección Xeral de Xuventude designado pola directora xeral, que actuará como secretario.

Esta comisión, valoradas as solicitudes conforme os criterios establecidos no artigo 5º desta orde, elevaralle proposta de resolución á directora xeral de Xuventude, que deberá dictar a correspondente resolución nun prazo de 10 días.

A resolución seralles notificada a todos os solicitantes no prazo máximo de catro meses, contados desde a publicación desta orde no Diario Oficial de Galicia. Transcorrido o dito prazo sen que recaia resolución expresa, deberá entenderse desestimada a petición correspondente. Esta resolución non esgota a vía administrativa e contra ela poderá interpoñerse recurso de alzada ante a conselleira de Familia, Xuventude, Deporte e Voluntariado no prazo dun mes a partir do día seguinte ao da notificación da resolución, de acordo co disposto nos artigos 114 e 115 da Lei 30/1992, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro. De ser o caso, será de aplicación o artigo 44 da Lei 29/1998, do 13 de xullo, reguladora da xurisdición contencioso-administrativa.

A antedita resolución publicarase nos taboleiros de anuncios da Dirección Xeral de Xuventude e das delegacións provinciais da Consellería de Familia, Xuventude, Deporte e Voluntariado.

Artigo 7º.-Reserva de prazas e primeiro pagamento.

1. Recibida a resolución, os beneficiarios están obrigados, no prazo de 10 días:

-A ingresar, en concepto de reserva de prazas, o 15% do importe correspondente ás prazas adxudicadas. A dita cantidade non será reintegrable en caso de que decaese a adxudicación realizada por incumprimento das obrigas expresadas neste artigo, se a entidade adxudicataria anulase a reserva de utilización da instalación, reducise o número de usuarios previstos ou os días de uso solicitado.

-A presentar, no Servizo de Xuventude da delegación da provincia en que estea a instalación adxudicada, a seguinte documentación:

a) Breve proxecto de actividades que se van realizar.

b) Acreditación da persoa que subscribiu a solicitude como representante da entidade solicitante.

c) Xustificante do aboamento do 15% expresado anteriormente.

2. Se transcorrido o prazo de 10 días desde a notificación da adxudicación non se cumprisen os requisitos anteriores, declararase expresamente, a través da oportuna resolución, a desistencia da solicitude efectuada, ofertándolle as prazas ao seguinte solicitante proposto pola comisión de valoración. En caso de non se cubriren as prazas desta forma, a delegación provincial correspondente reservarallas a quen as demande.

Artigo 8º.-Autorización de uso temporal.

1. Transcorridos 15 días desde a finalización do prazo establecido no artigo anterior, a entidade beneficiaria deberá formalizar o documento de aceptación das condicións particulares de uso da instalación e aboar o 40% do importe correspondente ás prazas que confirme. A dita cantidade ou a parte proporcional non será reintegrable se o número de usuarios ao inicio da actividade é menor ao confirmado.

O documento de aceptación das condicións particulares de uso e o xustificante do segundo ingreso presentaranse no Servizo de Xuventude da delegación da provincia en que estea a instalación adxudicada.

Así mesmo, presentarán a relación dos responsables que dirixan a actividade e a acreditación das titulacións exixidas en materia de tempo libre, tendo en conta o disposto no artigo 47 do Decreto 50/2000, do 20 de xaneiro, polo que se refunde e actualiza a normativa vixente en materia de xuventude (DOG nº 49, do 10 de marzo).

Cumpridas as condicións anteriores, a delegación da Consellería de Familia, Xuventude, Deporte e Voluntariado correspondente facilitaralle á entidade beneficiaria o documento de autorización de uso temporal da instalación.

2. A entidade beneficiaria deberá aboar, 20 días antes da data de incorporación á instalación adxudicada, o 45% do importe correspondente ás prazas confirmadas co segundo pagamento, de acordo co disposto no parágrafo primeiro deste artigo. A dita cantidade non será reintegrable se o número de usuarios ao inicio da actividade é menor que o confirmado.

A entidade beneficiaria deberá levar o xustificante deste terceiro ingreso no momento da incorporación á instalación adxudicada.

Se transcorridos os diferentes prazos establecidos nos parágrafos primeiro e segundo deste artigo non se fixesen os pagamentos correspondentes polas entidades beneficiarias, procederase de acordo co disposto no parágrafo segundo do artigo 7º desta orde.

Artigo 9º.-Obrigas dos beneficiarios.

Os adxudicatarios estarán obrigados:

1. A cumprir os requisitos que exixe a lexislación vixente, a observar as normas de réxime interior da instalación e as indicacións da persoa responsable dela no referente a aqueles aspectos non recollidos, expresamente, nas citadas normas.

2. A responder dos actos que se realicen nas instalacións concedidas e das consecuencias que deles se deriven, así como de toda responsabilidade civil derivada de calquera acto.

3. A aboar o importe dos desperfectos que produzan no material e nos equipamentos da instalación durante o período de uso desta.

Artigo 10º

Os prezos dos servizos ofertados nesta orde aparecen recollidos na letra A.1 do anexo I da Orde

do 23 de decembro de 2003, pola que se fixan as tarifas e prezos en servizos de xuventude nas instalacións xuvenís para o ano 2004 (DOG nº 251, do 29 de decembro).

O aboamento dos diferentes pagamentos regulados nesta orde efectuarase utilizando os impresos destinados para o efecto, que se encontran á disposición dos interesados na Dirección Xeral de Xuventude ou en calquera delegación provincial da Consellería de Familia, Xuventude, Deporte e Voluntariado.

Disposicións derradeiras

Primeira.-Autorízase a directora xeral de Xuventude para ditar as disposicións precisas para o desenvolvemento desta orde.

Segunda.-Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 1 de abril de 2004.

Pilar Rojo Noguera

Conselleira de Familia, Xuventude, Deporte

e Voluntariado

ANEXO I

Provincia	Instalación xuvenil	Data	Nº de prazas ofertadas	Total de prazas

A Coruña	Albergue xuvenil Mariña Española-Bergondo	14-24/6/2004	100	860
	Albergue xuvenil Gandarío-Bergondo	17-31/8/2004	100
		1-15/9/2004	50
		16-30/9/2004	200
	Campamento xuvenil Furelos-Melide	16-30/8/2004	60
	Campamento xuvenil Espiñeira-Boiro	17-31/8/2004	100
	Campamento xuvenil Virxe de Loreto-Porto do Son	16-30/7/2004	50
		1-15/8/2004	50
		17-31/8/2004	150
Lugo	Albergue xuvenil Area-Viveiro	15-29/6/2004	120	850
	Albergue xuvenil Benigno Quiroga-Portomarín	17-31/8/2004	50
	Residencia xuvenil Irmáns Pedrosa-Lugo	1-15/8/2004	30
		17-31/8/2004	50
	Campamento xuvenil A Devesa-Ribadeo	17-31/7/2004	125
		1-15/8/2004	225
		17-31/8/2004	250
Ourense	Residencia xuvenil F. López Cuevillas-Ourense	17-31/9/2004	65	165
	Campamento xuvenil Penedos de Xacinto-Entrimo	17-31/8/2004	100
Pontevedra	Residencia xuvenil Altamar-Vigo	1-15/7/2004	30	250
	Campamento xuvenil A Illa de Ons-Bueu	17-31/8/2004	100
	Albergue xuvenil As Sinas-Vilanova de Arousa	1-15/9/2004	120

2.125