A Consellería de Educación e Ordenación Universitaria publicou a Orde do 11 de novembro de 1998 pola que se declaran as equivalencias entre distintos cursos e probas de lingua galega cos cursos de niveis básico, medio e superior de linguaxe administrativa local galega -actualmente denominados de linguaxe administrativa galega- e de linguaxe xurídica galega, sen que se determine dunha maneira explícita e recíproca a equivalencia entre os cursos de linguaxe xurídica e de linguaxe administrativa galegas.
Co obxecto de evitar as distintas interpretacións a que puidese levar a falta de determinación no texto da antedita Orde do 11 de novembro de 1998, cos conseguintes prexuízos que se lles poden ocasionar aos posuidores dos certificados de tales cursos, e
tendo en conta a similitude de contidos dos cursos de linguaxe administrativa e de linguaxe xurídica, cómpre recoñecer expresamente a súa equivalencia, sen que se faga precisa a validación recíproca e puntual. En consecuencia,
DISPOÑO:
Artigo único.-Considéranse equivalentes os niveis -básico, medio e superior- dos cursos de linguaxe administrativa galega cos correspondentes niveis -básico, medio e superior- dos cursos de linguaxe xurídica galega.
Disposicións derradeiras
Primeira.-Autorízase o director xeral de Política Lingüística para dictar no ámbito das súas competencias, as resolucións necesarias para o desenvolvemento desta orde.
Segunda.-Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 10 de marzo de 2004.
Celso Currás Fernández
Conselleiro de Educación e Ordenación
Universitaria