Dentro dos programas de actividades que a Academia Galega de Seguridade ten previsto realizar no ano 2004, e conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a realización dun curso sobre protección do patrimonio cultural do Camiño, segundo o previsto no artigo 23 da Lei 3/1992, do 23 de marzo, de coordinación das policías locais, que deberá desenvolverse conforme as seguintes bases:
-Obxectivos.
Achegar unha información suficiente sobre os bens culturais de Galicia, coa finalidade de facilita-lo labor das forzas de seguridade na defensa destes.
Desde un punto de vista pluridisciplinar, abordarase con máis detalle a protección que o orde
namento xurídico dispensa ós bens histórico-artísticos, con especial incidencia nos aspectos culturais, urbanísticos e do ambiente.
A celebración este ano do Xacobeo 2004, determina a necesidade de realizar unha especial referencia ós Camiños de Santiago e á súa protección.
-Destinatarios.
O curso vai dirixido ós membros das forzas e corpos de seguridade con competencia no territorio polo que discorre o Camiño francés.
-Inscrición.
A inscrición dos participantes será totalmente gratuíta.
-Prazas: 30.
-Solicitudes.
1. O persoal que desexe participar neste curso deberá presentar, cuberta á máquina ou con letra moi clara, a instancia que figura no anexo.
2. O prazo para a presentación de instancias rematará o día 20 de abril de 2004, ás 14.00 horas.
3. As instancias deberán enviarse á Academia Galega de Seguridade; avenida da Cultura, s/n, 36680 A Estrada; ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
-Datas.
O curso desenvolverase durante os seguintes días: 27, 28 e 29 de abril de 2004.
O horario será de 10.00 a 14.00 e de 16.00 a 20.00 horas os días 27 e 28; sendo unicamente en xornada de mañá o día 29.
-Contido.
No curso desenvolveranse os seguintes temas:
I. A protección xurídica dos bens culturais.
II. A posta en valor do patrimonio arqueolóxico en Galicia.
III. Intervencións da Policía autonómica en relación co Patrimonio Cultural.
IV. Persecución dos atentados contra o patrimonio. Actuacións operativas.
V. A arte galega.
VI. Referencias históricas ó Camiño de Santiago.
VII. Aspectos penais da protección do patrimonio histórico e cultural.
VIII. A protección do ambiente. Especial referencia ó Camiño de Santiago.
IX. Ordenación urbanística e protección do medio rural.
-Relación de admitidos.
A relación de admitidos publicarase o día 22 de abril a partir das 14.00 horas, no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono 986 59 00 21.
-Lugar.
Sede da Academia Galega de Seguridade, sita na avda. da Cultura, s/n, no concello da Estrada.
-Certificado de asistencia.
Ó remate do curso entregaráselles un certificado de asistencia a aquelas persoas que acrediten a súa participación continuada a este.
-Modificacións.
A Academia Galega de Seguridade poderá modifica-lo desenvolvemento do curso para adaptalo ás necesidades da Administración e ás continxencias que poidan xurdir.
A Estrada, 12 de marzo de 2004.
Juan José Fariñas-Ferro Rodríguez
Director xeral da Academia Galega de Seguridade