Por Resolución do 29 de xullo de 1999 regulouse a compulsa e expedición de copias de documentos e achega de documentos ós procedementos na Universidade de Santiago de Compostela (DOG do 31 de agosto).
No Diario Oficial de Galicia do 11 de decembro de 2003 publicouse a Lei 6/2003, de taxas, prezos e exaccións reguladoras da Comunidade Autónoma de Galicia. Esta norma, aplicable á USC en virtude do seu artigo 3, establece importantes novidades que afectan o contido da antedita resolución. Deste xeito, modifícase a taxa por compulsa de documentos que pasa a ser de 1,20 euros o primeiro folio e 0,30 euros cada un dos folios seguintes (anexo I taxa 05 da antedita lei), así como que non se pode esixi-la taxa por servicios administrativos cando se trate de compulsas de documentos que os administrados deban achegar coas solicitudes, escritos ou comunicacións no ámbito de actuación dos rexistros, consonte co artigo 38.5º da LRXAP-PAC (artigo 21.2º da lei).
En consecuencia, faise necesario modifica-los artigos 6 e 23 da Resolución do 29 de xullo de 1999, pola que se regula a compulsa e expedición de copias de documentos e achegamento de documentos ós procedementos na USC.
Por todo o anterior, este rectorado resolveu:
Primeiro.-Modifica-lo artigo sexto da Resolución do 29 de xullo de 1999, do seguinte xeito:
«Sexto.-As taxas para aboar, de conformidade coa Lei 6/2003, de taxas, prezos e exaccións reguladoras da Comunidade Autónoma de Galicia, serán:
-1,20 euros o primeiro folio.
-0,30 euros por cada un dos folios seguintes».
Segundo.-Modifica-lo artigo vintetrés da Resolución do 29 de xullo de 1999, do seguinte xeito:
«Vintetrés.-Non se esixirá a taxa por servicios administrativos cando se trate de compulsas de documentos que se deban achegar a solicitudes, escritos ou comunicacións presentados polos administrados no ámbito de actuación dos rexistros consonte o disposto no artigo 38.5º da Lei 30/1992, do 26 de novembro, de réxime xurídico das administracións públicas e do procedemento administrativo común.
Así mesmo quedan exentos en todo caso do pagamento de taxas por compulsa aqueles documentos debidamente autenticados que deban ser entregados
na Universidade de Santiago de Compostela nos seguintes procedementos:
-Documentación xustificativa de requisitos para acceder ó Sistema de Residencias Integrado.
-Documentación xustificativa de requisitos para solicitar bolsa no sistema xeral.
-Documentación xustificativa de requisitos esixidos para a admisión de alumnos ou para a formalización da matrícula.
-Toda aquela documentación xustificativa de requisitos sempre que así se estableza expresamente na convocatoria reguladora».
O que se comunica para os efectos oportunos.
Santiago de Compostela, 10 de febreiro de 2004.
Senén Barro Ameneiro
Rector da Universidade de Santiago de Compostela
