Dentro dos programas de actividades que a Academia Galega de Seguridade, en colaboración co comisionado do Plan Galicia sobre Drogas, ten previsto realizar no ano 2004, e conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a realización das xornadas As drogas hoxe, que deberán desenvolverse conforme as seguintes bases:

Obxectivos.

-Coñece-las pautas actuais do consumo de drogas na sociedade galega.

-Saber a que colectivos e grupos de idade afecta en maior medida a problemática do consumo habitual ou puntual das drogas.

-Ver cales son os medios institucionais de prevención, represión ou posterior tratamento de desintoxicación que se ofrecen na actualidade.

Destinatarios.

Membros das forzas e corpos de seguridade.

Inscrición.

A inscrición dos participantes será totalmente gratuíta.

Prazas.

O número de prazas que se ofertan neste curso é de 250.

Solicitudes.

1. O persoal que desexe participar nestas xornadas deberá presentar, cuberta a máquina ou con letra moi clara, a instancia que figura no anexo.

2. O prazo para a presentación de instancias rematará o día 22 de marzo, ás 14.00 horas.

3. As instancias deberán enviarse á sede da Academia Galega de Seguridade: avenida da Cultura, s/n, 36680 A Estrada, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.

Datas e horario.

As xornadas desenvolveranse durante os días 24 e 25 de marzo. O día 24 desenvolveranse en xornada de mañá (9.30 a 14.00 horas) e tarde (16.00 a 19.00 horas); e o día 25 só en xornada de mañá (9.30 a 14.00 horas).

Relación de admitidos.

A relación de admitidos publicarase o 22 de marzo a partir das 16.30 horas, no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono: 986 59 00 21.

Lugar.

As xornadas desenvolveranse na sede da Academia Galega de Seguridade.

Certificado de asistencia.

Ó remate das xornadas entregaráselles un certificado de asistencia a aquelas persoas que acrediten a súa participación continuada a elas.

Modificacións.

A Academia Galega de Seguridade poderá modifica-lo desenvolvemento normal das xornadas para adaptalas ás necesidades da Administración e ás continxencias que poidan xurdir.

A Estrada, 26 de febreiro de 2004.

Juan José Fariñas-Ferro Rodríguez

Director xeral da Academia Galega de Seguridade