A importancia da comunicación oral e escrita como instrumentos de vertebración dun país e aínda como ferramentas útiles para facilitar, mediante o achegamento entre os pobos, o afondamento da democracia fan especialmente recomendable un mellor coñecemento desas técnicas.

A conciencia desa necesidade levou á inclusión nos orzamentos xerais da Comunidade Autónoma dos créditos destinados á realización de investigacións nese campo. Para o gasto derivado desta orde disponse de crédito adecuado e suficiente nos orzamentos xerais da Comunidade Autónoma para o 2004.

Coa finalidade de asegura-la publicidade e obxectividade na concesión, así como para promove-la participación,

DISPOÑO:

Primeiro.-Establécense axudas para fomenta-la realización de estudios sobre medios de comunicación. O importe global das axudas será de setenta e catro mil (74.000) euros.

Segundo.-A contía de cada axuda será de dous mil a seis mil euros (2.000 a 6.000 euros).

Terceiro.-Poderán solicita-las axudas particulares e entidades sen fin de lucro.

Cuarto.-A solicitude das axudas farase mediante instancia, segundo modelo do anexo, dirixida ó secretario xeral para as Relacións cos Medios Informativos, e irá acompañada da seguinte documentación:

a) Copia compulsada do documento nacional de identidade do solicitante.

b) Acreditación da representación con que actúa, se é o caso.

c) Memoria explicativa do contido, con indicación da súa dimensión e prazo de realización, debidamente asinada polo solicitante ou polo seu representante.

d) Currículum vitae do autor ou autores do estudio, debidamente asinado. Na documentación relacionada no currículum vitae deberán acompañar orixinais ou copias compulsadas daqueles documentos, títulos, etc., directamente relacionados co traballo.

e) Declaración xurada pola que se acredita o carácter inédito do traballo.

f) Declaración de conxunto de tódalas solicitudes efectuadas ou concedidas, para un mesmo proxecto, das distintas administracións públicas competentes.

No caso de que sexan varios coautores do mesmo traballo, deberán designar por escrito a un deles como representante dando a conformidade coa súa sinatura.

Quinto.-As solicitudes serán presentadas no rexistro xeral da Consellería da Presidencia, Relacións Institucionais e Administración Pública, sito no edificio administrativo de San Caetano, en Santiago de Compostela, ou nos das súas delegacións provinciais. Tamén se poderán remitir en calquera das formas previstas no artigo 38.4º da Lei de réxime xurídico das administracións públicas e do procedemento administrativo común, no prazo de corenta días naturais, contados a partir do día seguinte ó da publicación desta orde no Diario Oficial de Galicia.

As solicitudes presentadas serán tramitadas polo servicio competente da Secretaría Xeral para as Relacións cos Medios Informativos.

Sexto.-A resolución das axudas será realizada polo conselleiro da Presidencia, Relacións Institucionais e Administración Pública por proposta dunha comisión que avaliará as solicitudes presentadas e que será presidida polo secretario xeral para as Relacións cos Medios Informativos e que estará integrada por un funcionario desa secretaría xeral con categoría non inferior a xefe de negociado, que actuará de secretario, como vocais o subdirector xeral de Coordinación Administrativa e Xestión Orzamentaria e o responsable do Gabinete de Comunicación. A comisión terá en conta a finalidade do estudio e a súa relación coa realidade galega na materia, o seu carácter innovador, o currículum vitae do autor ou autores e calquera outra circunstancia que contribúa á modernización do sector.

O prazo máximo para dictar e notifica-la resolución será de tres meses contados desde a publicación desta orde no Diario Oficial de Galicia. Transcorrido o dito prazo sen resolución expresa, os interesados poderán entender desestimadas as súas solicitudes por silencio administrativo.

Sétimo.-A convocatoria, as súas bases e todos cantos actos administrativos se deriven dela, poderán ser impugnados polos interesados nos casos e na forma establecidos na Lei 30/1992, do 26 de novembro, de réxime xurídico das administracións públicas e do procedemento administrativo común modificada pola Lei 4/1999, do 13 de xaneiro.

Contra as resolucións expresas ou presuntas que se deriven desta convocatoria, que poñen fin á vía administrativa, poderán os interesados interpoñer potestativamente recurso de reposición ante o mesmo órgano, no prazo dun mes contado a partir do día seguinte ó da recepción da correspondente notificación no caso de resolucións expresas. No caso de que a resolución se entenda desestimatoria por silencio administrativo, o prazo será de tres meses contados a partir do día seguinte ó que se produza o acto presunto.

De non estima-la presentación deste recurso poderán os interesados interpoñer recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia no prazo de dous meses contados a partir do día seguinte ó de recepción da correspondente notificación, se a resolución é expresa. No caso de que a resolución se entenda desestimada por silencio administrativo o prazo será de seis meses contados a partir do día seguinte ó que se produza o acto presunto.

Oitavo.-A concesión das axudas farase con cargo á aplicación 04.04.361A 480.0 que dispón de crédito adecuado e suficiente nos orzamentos xerais da Comunidade Autónoma para o ano 2004.

De conformidade co estipulado no artigo 42.1º da Lei 8/2003, do 23 de decembro, de orzamentos xerais da Comunidade Autónoma para 2004, quedan exentos de achega-los xustificantes do cumprimento das obrigas a que se refiren os artigos 78 e 79 do Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia, as subvencións e axudas con cargo ós créditos orzamentarios correspondentes ó artigo 48, Familias e institucións sen fin de lucro.

Noveno.-O pagamento tramitarase unha vez entregado o estudio obxecto da axuda.

No momento da xustificación da execución total do estudio e, en calquera caso, antes de efectua-lo pagamento, o peticionario presentará unha declaración complementaria do conxunto das axudas soli

citadas tanto as aprobadas ou concedidas como as pendentes de resolución, para un mesmo estudio das distintas administracións públicas competentes ou calquera dos seus organismos, entes ou sociedades.

Décimo.-Os estudios resultantes das memorias seleccionadas serán entregados na Secretaría Xeral para as Relacións cos Medios Informativos antes do día 30 de setembro de 2004.

Os estudios presentaranse por triplicado, debidamente foliados e encadernados e coa sinatura do autor ou autores. A súa extensión non será inferior ós 100 folios de 1.200 caracteres, e non se computarán as copias íntegras ou parciais das publicacións ou estudios xa existentes.

De non entregarse o estudio no prazo sinalado, ou de entregarse cun contido distinto ó previsto na memoria, o beneficiario perderá o seu dereito á percepción da axuda.

Décimo primeiro.-O autor ou autores dos traballos seleccionados, no mesmo momento de acepta-la axuda ceden á Secretaría Xeral para as Relacións cos Medios Informativos tódolos dereitos sobre o traballo presentado, reservándose esta a capacidade de publicalo, se así o estimase oportuno.

Décimo segundo.-A vixencia desta orde de axudas será ata o 31 de decembro de 2004.

Disposicións derradeiras

Primeira.-Nos aspectos non contidos nesta orde, haberá que aterse ó disposto no artigo 78 da Lei de réxime financeiro e orzamentario de Galicia, texto refundido aprobado polo Decreto lexislativo 1/1999, do 7 de outubro, e Decreto 287/2000, do 21 de novembro, que o desenvolve, e o artigo 42 da Lei 8/2003, do 23 de decembro, de orzamentos xerais da Comunidade Autónoma de Galicia para o 2004.

Segunda.-Facúltase o secretario xeral para as Relacións cos Medios Informativos para dictar, no ámbito das súas competencias, as resolucións precisas para o desenvolvemento desta orde.

Santiago de Compostela, 27 de febreiro de 2004.

Jaime Pita Varela

Conselleiro da Presidencia, Relacións

Institucionais e Administración Pública