Dentro do plan de actividades da Escola Galega de Administración Pública para o 2004 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse unhas Xornadas sobre poder xudicial e comunidades autónomas, conforme as seguintes bases:
1. Obxectivos.
Analiza-las principais novidades da reforma da Lei orgánica do poder xudicial (L.O. 6/1985, do 1 de xullo) operada pola L.O. 19/2003, do 23 de decembro, relacionadas coas competencias en materia de xustiza transferidas ás comunidades autónomas.
2. Contido.
Trataranse estes temas:
-Estado autonómico e poder xudicial.
-Ámbito da competencia dos tribunais superiores de xustiza en materia de dereito civil: as peculiaridades do caso galego.
-A especialización da carreira xudicial. Especial consideración dos xulgados do mercantil.
-O procurador dos tribunais: as súas funcións.
-A policía xudicial.
-Do mito de Sísifo ou da xurisdicción competente para coñecer das accións de responsabilidade civil
fronte a unha Administración pública, no caso de existencia dun seguro de responsabilidade civil.
-A abstención e recusación dos xuíces e maxistrados.
-O secretario xudicial e a oficina xudicial.
-O Consello Xeral do Poder Xudicial: as súas competencias.
3. Destinatarios.
Persoal ó servicio da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e datas: as xornadas convocadas terán lugar no salón de actos do edificio administrativo da Xunta de Galicia na Coruña (praza de Pontevedra, s/n, da citada cidade) os días 22 e 23 de marzo de 2004.
5. Inscrición.
-Prazo: remata o día 17 de marzo de 2004.
-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemen
to administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscricións fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando por teléfono, o próximo día 18 de marzo, de 8.30 a 14.30 horas, ós seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como o de cancelalas, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.
Santiago de Compostela, 24 de febreiro de 2004.
Domingo Bello Janeiro
Director da Escola Galega de Administración Pública