En coherencia cos programas mediante os que anualmente a Consellería de Política Territorial Obras Públicas e Vivenda vén creando unha liña de axudas ás corporacións locais de Galicia, para os efectos de consegui-lo planeamento urbanístico máis adecuado, é procedente a publicación de nova convocatoria para conseguir un maior fomento na redacción, tramitación e aprobación dos documentos urbanísticos que se contemplan nesta orde, de acordo coa Lei 9/2002, do 30 de decembro, de ordenación urbanística e de protección do medio rural de Galicia.

A experiencia durante o ano 2003 da aplicación da lei mencionada leva a considerar como o máis adecuado a orde de prioridades e criterios para a concesión das axudas recollidas nesta orde. Así mesmo, e co obxecto de promover formas de xestión integrada no sistema urbano e territorial do noroeste peninsular, é conveniente considerar un certo grao de prioridade ós concellos limítrofes con Portugal, o que permitirá a análise das tendencias de evolución urbanística nestas áreas de influencia do país veciño.

Esta experiencia amosa as dificultades de xestión das axudas, derivada do específico proceso de elaboración e tramitación do planeamento urbanístico. Por esta razón regúlase especialmente o procedemento para a xustificación do investimento por parte dos beneficiarios.

Polo tanto, en uso das facultades que teño atribuídas e para a debida aplicación dos créditos orzamentarios para a finalidade para a que foron establecidos

DISPOÑO:

Artigo 1º.-Obxecto e destinatarios.

1. Constitúe o obxecto desta orde a concesión de axudas, en réxime de concorrencia competitiva a entidades locais que o soliciten, para a realización de traballos de redacción de planeamento urbanístico, de acordo co disposto no seguinte punto.

2. Poderán ser obxecto de axuda:

a) A redacción de plans xerais de ordenación municipal, ben sexa como figura de nova formulación ou como revisión ou adaptación dos instrumentos de planeamento vixentes ou en tramitación.

b) A redacción de plans especiais de protección e plans especiais de protección, rehabilitación e mellora do medio rural.

c) A execución de cartografía analítica para a redacción de planeamento urbanístico, sempre que non forme parte dos programas de contratación da consellería e resulte compatible tecnicamente cos sistemas de execución empregados nestes programas.

3. Poderán acollerse, así mesmo, ás axudas previstas aqueles concellos da Comunidade Autónoma que á entrada en vigor desta orde tiveran contratados ou en fase de contratación traballos dos contemplados anteriormente, sempre que a dita contratación se axuste ó disposto no artigo 9º desta orde con respecto ós pregos de prescricións técnicas.

4. Será posible, a concesión de axudas por fases do traballo, e segundo o prego de condicións mediante o que se contratou.

Artigo 2º.-Financiamento.

As axudas outorgadas conforme o disposto nesta orde serán financiadas con cargo á aplicación orzamentaria 06 02 332 A 760 dos orzamentos xerais da Comunidade Autónoma de Galicia para o ano 2004 e cun importe de 1.670.000 A. Esta cantidade poderase incrementar, se as dispoñibilidades económicas o permiten. Así mesmo, destinaranse á finalidade desta orde os importes que, se é o caso, se produzan como consecuencia da renuncia e/ou anulación de axudas concedidas ó abeiro de ordes de anos anteriores.

As axudas poderán ser de carácter plurianual cos límites e porcentaxes establecidos no punto 3º do artigo 58 do texto refundido da Lei de réxime financieiro e orzamentario de Galicia.

En todo caso a concesión da axuda estará condicionada á existencia de crédito suficiente para o seu finanzamento.

Artigo 3º.-Criterios de adxudicación das axudas.

1. Para establecer prioridades na selección de solicitudes que presenten os concellos, establécese a seguinte orde de prevalencia:

a) Revisión e/ou adaptación á Lei 9/2002, do 30 de decembro, de ordenación urbanística e protección do medio rural de Galicia, de planeamento municipal vixente ou en tramitación, así como a cartografía que, de se-lo caso, resultase precisa, sempre que o plan estivese presentado na consellería para o seu informe previo á aprobacion inicial e, que non fose devolto ó concello por carencias na documentación, ou aprobado inicialmente polo concello.

b) Redacción de plans xerais de municipios nos que fose obxecto dun decreto autonómico de suspensión ou sentencia xudicial de anulación.

c) Redacción de plans xerais daqueles concellos de menos de 50.000 habitantes, que teñen especial problemática urbanística. Esta circunstancia deberá acreditarse mediante informe da Subdirección Xeral de Urbanismo.

d) Redacción de plan xeral de ordenación municipal en concellos que carecen de planeamento urbanístico, así como a cartografía que, se é o caso, resultase precisa.

e) Redaccion de plan xeral de ordenación municipal de concellos limítrofes con Portugal.

f) Redacción de plans especiais de protección ou plans especiais de protección, rehabilitación e mellora do medio rural, así como a cartografía que, de se-lo caso, resultase precisa.

Para o caso de plans especiais, deberá estar vixente ou en tramitación simultánea o planeamento xeral que aqueles desenvolven.

2. Para resolve-las solicitudes que se presenten teranse presentes os seguintes criterios principais, graduados segundo a súa importancia.

-Daráselle prioridade á elaboración de figuras de planeamento de carácter supramunicipal. Neste caso, a solicitude deberá estar subscrita por tódolos concellos afectados.

En todo caso valorarase a antigüidade do planeamento vixente así como a entidade do concello (poboación, dimensión e complexidade dos núcleos urbanos), o seu historial urbanístico, a influencia da aprobación do planeamento urbanístico para acadar intereses públicos concretos, a situación en áreas de alta conflictividade urbanística e a existencia de bens de interese cultural ou espacios naturais declarados polo organismo competente. Estas circunstancias faranse constar no informe proposta ó que se refire o artigo 6º.1 parágrafo 2º desta orde.

As cuestións anteriormente apuntadas deberán ser expostas motivadamente pola entidade local solicitante na memoria á que se refire o artigo 5º.

Artigo 4º.-Contía das axudas.

1. As subvencións que se outorguen serán de ata o 70% do orzamento de contratación previsto, tendo en conta o número de solicitudes presentadas e a aplicación dos criterios recollidos no artigo 3º.2.

2. O orzamento ó que fai referencia este artigo será, en todo caso, o calculado ou aceptado pola Dirección Xeral de Urbanismo, unha vez recibido informe da Subdirección Xeral de Urbanismo. Para estes efectos, tomaranse como referencia os honorarios resultantes dos baremos aprobados polo Colexio Oficial de Arquitectos de Galicia, coas actualizacións que, de darse o caso, fose preciso introducir.

3. A suma das axudas e subvencións recibidas por unha entidade local para a redacción de instrumentos de planeamento urbanístico, que proveñan de entes públicos ou privados e percibidas coa mesma finalidade, non poderán nunca supera-lo 100% do orzamento de contratación global.

Para tal fin, a entidade subvencionada, deberá poñer en coñecemento da Dirección Xeral de Urbanismo, o importe doutras axudas para igual fin outorgadas por outros entes públicos ou privados.

Artigo 5º.-Prazo de presentación de solicitudes e documentación.

1. No prazo de corenta días naturais, contados a partir do día seguinte ó da publicación desta orde no Diario Oficial de Galicia, as entidades locais interesadas deberán presentar no rexistro da Consellería de Política Territorial, Obras Públicas e Vivenda, nos das súas delegacións provinciais, ou mediante calquera das formas previstas no artigo 38 da Lei 30/1992, do 26 de novembro, de réxime xurídico das administracións públicas e do procedemento administrativo común, unha solicitude de acordo co modelo que figura como anexo I a esta orde, acompañada da seguinte documentación:

a) Memoria na que se xustifique a necesidade e oportunidade dos traballos para os que se solicita subvención, con expresión detallada daquelas circunstancias das expostas no artigo 3º desta orde que a entidade solicitante considere de aplicación.

b) Orzamento estimado de elaboración de cada un dos traballos para os que se solicita a axuda, especificando xustificadamente o método de valoración empregado.

c) Para o caso previsto no artigo 1º.3 desta orde, certificación na que se faga consta-la existencia do contrato de elaboración dos traballos e o seu importe e forma de pagamento contractual.

d) Declaración do conxunto de tódalas solicitudes efectuadas ou concedidas, para o mesmo proxecto, ante as administracións públicas competentes ou outros entes públicos.

Artigo 6º.-Resolución.

1. Deléganse no director xeral de Urbanismo, o exercicio das competencias para resolve-los procedementos de concesión, aprobación do gasto e demais actuacións para o desenvolvemento das axudas obxecto desta orde. Así como o recoñecemento de obrigas e proposta ó conselleiro de Economía e Facenda da ordenación dos correspondentes pagamentos que procedan.

Para tal efecto a Subdirección Xeral de Urbanismo procederá, de acordo co disposto no artigo 9 do Decreto 287/2000, polo que se regulan axudas e subvencións públicas da Comunidade Autónoma de Galicia, á avaliación das peticións recibidas, en función dos criterios establecidos no artigo 3º desta orde, e formulará unha proposta de concesión, ata os límites dos créditos orzamentarios destinados para tal fin.

2. Nas resolucións de concesión das subvencións, que serán motivadas de acordo cos criterios de outorgamento e porán fin á vía administrativa de acordo co artigo 10 do Decreto 287/2000, indicarase o obxecto e contía da subvención e o programa de pagamentos correspondente a elas.

3. O prazo para resolver e notifica-las solicitudes ó abeiro desta orde será de tres meses, que se computarán a partir do seguinte ó de publicación desta orde no Diario Oficial de Galicia.

De acordo co artigo 44.1º da Lei 30/1992, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro, o vencemento do prazo máximo establecido, sen que se dictase e notificase resolución expresa, determinará que os solicitantes poidan entender desestimadas as súas pretensións por silencio administrativo.

Sen prexuízo do potestativo recurso de reposición ante o órgano que o dictou, no prazo establecido no artigo 117 da Lei 30/1992, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro, contra a resolución poderá interpoñerse recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia na forma e nos prazos establecidos na Lei 29/1998, do 13 de xullo, reguladora da xurisdicción contencioso-administrativa.

Artigo 7º.-Aceptación da subvención.

1. A entidade local beneficiaria disporá do prazo de quince días, contados a partir da recepción da notificación da resolución de concesión, para comunica-la aceptación da subvención. Para tal efecto deberá xunta-la seguinte documentación:

a) Certificación do acordo do órgano competente da entidade local polo que se acepte a subvención nos termos e prescricións desta orde e da resolución de concesión.

b) Certificación na que se faga constar que non existen outras subvencións aplicables ós traballos obxecto da axuda ou, de existir, que tódalas subvencións aplicables ós citados traballos non superan a totalidade do seu orzamento.

c) Certificación de que existen os fondos necesarios para lles facer fronte ás achegas que deberá realiza-la entidade local.

d) Acordo do órgano municipal competente que recolla o establecido nos dous puntos seguintes:

-Autorización á Dirección Xeral de Urbanismo, para a utilización do documento de planeamento, obxecto da axuda, na súa totalidade ou parcialmente, para publicación de xeito convencional ou a través de páxina web, podendo percibi-la citada Dirección Xeral de Urbanismo, de se-lo caso, os importes para

o resarcimento dos servicios prestados pola publicación e/ou venda de contidos do documento citado.

-Compromiso de entrega á Dirección Xeral de Urbanismo, en soporte dixital (CD ou DVD preferentemente) de toda a documentación que integra o traballo subvencionado, en tódalas súas fases, especialmente os documentos definitivos. Esta entrega deberá realizarse, para o planeamento, no prazo máximo de dous meses desde que se produza o acto administrativo de aprobación definitiva, e para a cartografía, con anterioridade ó derradeiro aboamento correspondente a ela.

2. Transcorrido o prazo indicado no punto anterior sen que se produza a dita comunicación, e de non xustificarse suficientemente a concorrencia de circunstancias excepcionais que impidan facelo, dictarase resolución deixando sen efecto a concesión da axuda. Esta resolución será obxecto de recurso nos mesmos termos que se establecen no último punto do artigo 6º desta orde.

Artigo 8º.-Obriga de cumprimento de prazos.

1. A entidade local vén obrigada a xustificar ante a Dirección Xeral de Urbanismo, antes do 30 de outubro de cada ano o cumprimento de execución das fases que dean lugar a libramentos parciais, segundo se estableza nos documentos contractuais que o concello teña asinados para a redacción da correspondente figura de planeamento. O importe dos libramentos xustificados acadará polo menos o total da anualidade establecida na resolución de concesión.

Todo isto de conformidade co establecido no artigo 15 c) e 16.dous do Decreto 287/2000, do 21 de novembro, DOG nº 238, do 11 de decembro.

2. O incumprimento dos prazos parciais, comprendidos na anualidade establecida na resolución de concesión da axuda determinará que o órgano concedente proceda á apertura do correspondente procedemento para, logo da audiencia ó interesado, resolve-la reducción da súa contía polo importe correspondente ó prazo incumprido, salvo circunstancias excepcionais debidamente acreditadas pola entidade local beneficiaria da subvención e que xustificarán suficientemente ante a Dirección Xeral de Urbanismo con anterioridade ó vencemento do prazo indicado.

Artigo 9º.-Pregos de prescricións técnicas.

As entidades beneficiarias das subvencións empregarán, con carácter preferente, no proceso de contratación dos traballos os pregos de prescricións técnicas facilitados para o efecto pola Dirección Xeral de Urbanismo. Para o caso de que os pregos sexan elaborados directamente polos concellos, deberán contar co informe favorable dos servicios técnicos da Dirección Xeral de Urbanismo.

Artigo 10º.-Garantías e xustificación do investimento e pagamentos.

1. Para garanti-lo investimento e rendemento das axudas concedidas ó abeiro desta orde, establécense as seguintes regras:

a) A entidade local deberá acreditar, ante a Dirección Xeral de Urbanismo, o compromiso de gasto da totalidade da achega que lle corresponde, como requisito previo para o pagamento da axuda.

b) O pagamento da axuda efectuarase conforme o programa de execución por fases establecido nos documentos contractuais que o concello teña asinados para a redacción da correspondente figura de planeamento.

c) Para proceder ó aboamento das achegas parciais, a entidade beneficiaria deberá xustificar ante a Dirección Xeral de Urbanismo a realización da correspondente fase dos traballos e demais requisitos establecidos nesta orde.

Para tal efecto, o concello deberá presentar certificación detallada, expedida polo director do traballo, nomeado polo concello entre o seu persoal técnico para estes efectos, relativa ó cumprimento da fase, dos pregos de prescricións do contrato subscrito e o pagamento proporcional que lle corresponde ó concello con respecto á fase citada. Esta certificación, se fose o caso, tamén incluirá a xustificación de ter realizado o pagamento, ó adxudicatario do contrato, do total da axuda recibida para a fase anterior.

Así mesmo, en cada fase, a entidade beneficiaria deberalle achegar á Dirección Xeral de Urbanismo copia en soporte dixital dos traballos efectuados.

2. Os libramentos correspondentes realizaranse, se é o caso, de acordo coas prescricións establecidas no artigo 42 da Lei 8/2003, de orzamentos xerais da Comundade Autónoma de Galicia para o ano 2004.

3. Coa aceptación da subvención a corporación local asume os seguintes compromisos:

-Reintegrarlle á Comunidade Autónoma, de acordo co artigo 78.9º do texto refundido da Lei de réxime financeiro e orzamentario de Galicia, a cantidade total ou parcial da axuda establecida, e dos xuros de mora devengados desde o momento do seu pagamento, para o caso de incumprimento das condicións establecidas na resolución de concesión.

-Facilitarlle, se fose o caso, toda a información que lle sexa requirida pola Intervención Xeral da Comunidade Autónoma, polo Tribunal de Contas e polo Consello de Contas de Galicia, no exercicio das súas funcións de fiscalización e control do destino das axudas obxecto desta orde.

-Comunicarlle á Consellería de Política Territorial, Obras Públicas e Vivenda, se fose o caso, as alteracións das condicións tidas en conta para a concesión da axuda obxecto desta orde e en todo caso a obtención concorrente de subvencións ou axudas

outorgadas por outras administracións, entes públicos ou privados, nacionais ou internacionais para os efectos de propoñer, se procedese, a modificación das condicións establecidas na resolución de concesión da axuda.

-Asumir, pola súa consideración de beneficiario segundo o artigo 78.4º do texto refundido da Lei de réxime financeiro e orzamentario de Galicia tódalas obrigas que, para iso, establece o citado artigo.

4. As entidades beneficiarias das axudas reguladas por esta orde quedan obrigadas, ademais de ás actuacións que acorde a entidade concedente, ó disposto no Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia e o réxime de infraccións e sancións que establece o artigo 79 do texto refundido da Lei de réxime financeiro e orzamentario de Galicia.

5. A Dirección Xeral de Urbanismo poderá supervisa-la execución dos traballos, co obxecto de comproba-lo cumprimento dos requisitos establecidos. Para tal fin o concello deberá comunica-lo nomeamento do director dos traballos, co fin de que as unidades administrativas dependentes da consellería teñan acceso á información necesaria durante o desenvolvemento das distintas fases.

Disposicións adicionais

Primeira.

1. De xeito excepcional, as entidades locais beneficiarias de axudas concedidas ó abeiro de ordes precedentes que quedasen sen efecto, de acordo co establecido nelas, poderán solicitar, ó abeiro desta orde, unha nova axuda polo importe correspondente ás fases non xustificadas das citadas axudas, así como, se é o caso, o custo da adaptación do instrumento de planeamento en tramitación á Lei 9/2002, do 30 de decembro, de ordenación urbanística e protección do medio rural de Galicia. Neste caso, deberá xuntarse un cronograma de execución dos traballos que reflicta de xeito inequívoco, as fases e prazos de execución pendentes de cumprir.

2. Neste caso, a documentación achegada polo concello ó expediente orixinado pola subvención que quedou sen efecto, quedará incorporada ó novo expediente.

3. As axudas concedidas ó abeiro desta disposición rexeranse polo disposto nesta orde.

Segunda.-A Dirección Xeral de Urbanismo poderá realizar, durante o prazo de vixencia da orde, os reaxustes das anualidades orzamentarias, que razoadamente considere oportunas, en función do cumprimento dos prazos inicialmente establecidos na resolución de adxudicación. Este reaxuste non poderá modifica-lo importe total da subvención, nin no seu conxunto, as porcentaxes que, sobre investimento plurianual, establece o artigo 3 da Lei 5/2000, do 28 de decembro, de medidas fiscais e de réxime orzamentario e administrativo, que modifica o pun

to 3º do artigo 58, do texto refundido da Lei de réxime financeiro e orzamentario de Galicia, aprobado polo Decreto lexislativo 1/1999, do 7 de outubro. Destes actos daráselles traslado ás entidades locais afectadas.

Disposición derradeira

Esta orde entrará en vigor o día seguinte ó da súa publicación no Diario Oficial de Galicia.

Santiago de Compostela, 18 de febreiro de 2004.

Alberto Núñez Feijoo

Conselleiro de Política Territorial, Obras Públicas

e Vivenda